Ыам ыйын 26 күнүгэр өрөспүүбүлүкэ бары оскуолаларыгар “Тиһэх чуораан” чугдаарда. Ол тэҥэ улуус саамай улахан оскуолатыгар быйыл 11 кылааһы 34 выпускник, 9 кылааһы 79 выпускник бүтэрэр тэрээһин үөрүүлээх чааһын оскуола дириэктэрэ Петр Баханов ис сүрэҕиттэн тахсар эҕэрдэтинэн саҕаланна.
Быйылгы выпускниктар алта туйгун үөрэнээччилээх оскуола биир бастыҥ выпуһунан буоллулар, кылаас салайааччыларынан СӨ үөрэҕириитин туйгуна Люция Бурцева итиэннэ оскуола психолога Анастасия Москвитина буоллулар.
Тэрээһин үөрүүлээх чааһыгар улуус баһылыга Василий Алексеев оскуола педколлективыгар, техүлэһиттэригэр үгүс ахсааннаах үөрэнээччилэри иитэн-такайан таһаарыыга сүҥкэн кылааттарын иһин махтал истиҥ тылларын анаата. Быйылгы выпускниктар ханна да буоллаллар төрөөбүт дойдуларын, саха омук буолалларын, үөрэммит оскуолаларын умнубакка үтүө—мааны дьон буолалларыгар аҕалыы алгыһын тириэртэ. Итиэннэ оскуола бастыҥ выпускниктарыгар Дайаана Артамоноваҕа, Эрсан Готовцевка, Далаана Черкашинаҕа улуус баһылыгын грамоталарын туттарда. Оттон Мүрү нэһилиэгин депутаттарын Сэбиэтин бэрэссэдээтэлэ Олег Федоров оскуола бастыҥ үөрэнээччилэрин, спортсменнарын Кирилл Охлопковы, Виктория Егорованы, Екатерина Крылованы, Саргылана Бочкареваны, Ольга Данилованы, Виолетта Черкашинаны, о.д.а. наҕараадалаата. Улуус үөрэҕин идэлээх сойууһун бэрэссэдээтэлэ Николай Готовцев улуус инники эрэллэригэр үрдүкситиһиилээх эксээмэни, инники идэлэрин сөпкө талалларыгар баҕа санаатын тириэртэ. Итиэннэ үөрэх управлениетын бочуотунайграмоталарын Дайаана Лукачевскаяны, Далаана Черкашинаны, Валентина Гоголевка, Михаил Новоприезжайга, Ольга Даниловаҕа туттарда. Бу үөрүүлээх күҥҥэ оскуола завучтара, метод.холбоһуктар, “Кэнчээри” ансаамбыл салайааччыта Василий Парников, улуустааҕы культура, спорт салааларын бириэмийэлэринэн бастыҥтан бастыҥнар бэлиэтэннилэр.
Тэрээһин биир ураты көстүүтүнэн Мүрү орто оскуолатын 50 сыл анараа өттүгэр 1976 сыллаахха бүтэрбит выпустар эҕэрдэлэрэ, бэлэхтэрэ буолла.
Онон бу курдук сиэттиспитинэн быйылгы выпускниктар олох киэҥ аартыгар түмсүүлээхтик, сомоҕоһуулаах кылаастар буолалларыгар ис сүрэхтэн баҕарабыт.
Светлана Сивцева
Мария Аргунова хаартыскаҕа түһэриилэрэ