Улуус киин поликлиникатыгар бүгүҥҥүттэн бээтинсэ күнү киллэрэн туран, ол эбэтэр алтынньы 23-25 күннэригэр профилактика кабинетыгар (9№-дээх кабинекка) ким бэйэтин доруобуйатыгар кыһаллар, эрдэттэн ыарахан ыарыылары сэрэтэр инниттэн буор босхо онкомаркерга хаан аналиһын туттаран, “Онкопоиск” диэн анал акцияҕа кыттар кыахтанна. Акция кэмигэр баҕалаах дьонтон хаан аналиһын ылан, үгүс киһи доруобуйатын туругун бэрэбиэркэлэнэригэр кыах бэрилиннэ.
Хас биирдии киһи доруобуйатын туругун эрдэттэн билэригэр анаан сыллата диспансеризация ыытыллар. Онно бары флюорографияҕа, дьахталлар маммографияҕа, ону тэҥэ хаан, иик уопсай анаалыстарын, хааҥҥар саахар кээмэйин быһаарар анаалыһы, мазок анаалыһы босхо туттараллар, түһэллэр.
Оттон “Онкопоиск” акцияҕа АФП, РЭА, СА-19-9, СА-125, СА-15-3, СА-72,4, ПСА (уопсай) онкология маркердарын – ас буһарар уорганнар (куртах, оһоҕос, быар), эр киһи, дьахтар ууһатар органнарын, эмиий искэнин эрдэттэн билэр гына хаан анаалыһын туттара сарсыарда 9 чаастан киэһэ 17 чааска диэри (аһаан да баран туттарыаххын сөп) тиийиэххин сөп.
Мария Алексеева, Бороҕон олохтооҕо, 61 саастаах:
– “Онкопоиск” акция туһунан билэр дьоммуттан телефон нөҥүө билэн баран, тутатына анализ туттара кэллим. Бэйэм диспансеризацияны сыллата көтүппэккэ ааһабын. Улууспутугар кардиолог, онколог баара буоллар, өссө үчүгэй буолуо этэ. Ырааппакка үрдүгэр көрдөрүнэр, эмтэнэр туһуттан.
Лена Готовцева, Бороҕон олохтооҕо, 63 саастаах:
– Олохтоох поликлиникабар диспансеризацияны бэйэм баҕабынан кэлэн көрдөрөөччүбүн. Оттон онкология маркердарын саҥа биэрдим. Урут биэрэ илигим. Онон маннык босхо анализ тэриллэрэ олус наадалаах дии санаатым.
Варвара Сергеева, Бороҕон олохтооҕо, 72 саастаах:
– Мин доруобуйабын эрдэттэн көрдөрүнэ, эмтэнэр, кыаллар буоллаҕына операция да ааһары сөптөөҕүнэн ааҕабын. Эн доруобуйаҕар бэйэҥ эрэ кыһалларгын өйдөөн, маннык акцияларга кыттар олус туһалаах, табыгастаах дии саныыбын. Дьокуускайга чааһынай клиникаларга онкомаркер балачча төлөбүрдээх буоларын билэбин.
Галина Копырина, Майаҕас олохтооҕо, 73 саастаах:
– Киһи доруобуйата киһи сааһыттан тутулуга суох араҥаччыланыахтаах. Быйыл нэһилиэкпитигэр саҥа фельдшер үлэлии кэлэрин кэтэһэбит. Бороҕон ыраах да буоллар, “Онкопоиск” диэн акция тэриллэрин истэн тута таксинан кэлэн, анализпын биэрдим.
Саргылана Рожина, Мындааба олохтооҕо, 54 саастаах:
– Бэйэм оҕо саадын үлэһитэ буоламмын, санитарнайы, диспансеризацияны сыл аайы ааһабын. Оттон онокомаркеры туттарыыны тэрийдэхтэринэ, истээт да тута сүүрэн кэлэн анализ туттарааччыбын. Бэйэм учаастактааҕы терапевт бырааспар Иннокентий Лукачевскайга учуокка туран көрдөрүнэбин. Олус кыһамньылаахытк, сыныйан көрөрүттэн астынабын, махтанабын. Өссө УЗИ өҥөтө кэҥиирэ, физиокабинет баара буоллар.
Вероника Федорова, Бороҕон олохтооҕо, 38 саастаах:
– Телефон нөҥүө бу акция тэриллэрин истээт, тута кэллим. Эбиэт чугаһаан, улахан уочарат суох буолан, анкета толороот анализ биэрэрбин кэтэһэ олоробун. Олохтоохтору, үс күн устата ыытыллар акцияҕа бэйэҕит уонна чугас дьоҥҥут доруобуйатыгар, инники олоххут туһугар кыһаллан кэлэн кыттаргытыгар ыҥырабын.
Светлана Сивцева