Бүгүн улуус мунньаҕын уочараттаах V сессиятыгар дьокутааттар тоҕус боппуруоһу иһиттилэр. Сессияны улуус мунньаҕын бэрэссэдээтэлэ Иннокентий Аммосов салайан ыытта. Боппуруос быһыытынан үксэ отчуоттар истилиннилэр. Ол курдук улуус дьаһалтатын, хонтуруоллуур-ааҕар палата, административнай хамыыһыйа, ис дьыала отделын ааспыт сыллааҕы үлэлэрин туһунан отчуоттар турдулар. Ону тэҥэ араас бытархай боппуруостар көрүлүннүлэр.
Улуус дьаһалтатын 2023 сыллааҕы үлэтин отчуотун баһылык Василий Аммосов туруорда. Дьокутааттар бу отчуот сүрүннээн урут үлэлээн ааспыт дьаһалта үлэтэ диэн этэн туран, эһиилги отчуокка ыйтыылары биэриэхпит диэн дьаһалта үлэтин сөптөөҕүнэн сыаналаатылар. Арай тыа хаһаайыстыбатыгар киирэр уларыйыылар улуус тыатын хаһаайыстыбата инники сайдыытыгар кэккэ мэһэйдэри үөскэтэллэринэн, итиннэ уларытыылары оҥорорго этии киллэрдилэр.
Атын да салаалар отчуоттарыгар мөккүөрдээх, өйдөммөт ыйытыылар бэриллибэтилэр. Ис дьыала отделын отчуотун истэн баран дьокутаат Гаврил Бурцев «үөһээ Радиотумулга баар “Үрдэл” маҕаһыын күнүстэри арыгы атыылыыра хонтуруолланар дуо?» диэн ыйыппытыгар ис дьыала отделын начальнига Дмитрий Скрябин ити маҕаһыын үлэтэ барыта сокуон ирдэбилигэр сөп түбэһэринэн анаан хонтуруол суох диэн хоруйдаата.
Бүтэһигинэн дьокутаат боломуочуйатын туһунан боппуруос турда. Өлтөхтөөҕү 4№-дээх уокуруктан улуус мунньаҕар дьокутаат Гаврил Тимофеев атын үлэҕэ, судаарыстыбаннай сулууспаҕа көспүтүнэн, тус сайабылыанньатыгар олоҕуран боломуочуйатын устуммутун туһунан иһитиннэрии оҥоһулунна. Онон бу уокурукка аны күһүн балаҕан ыйгар эбии быыбар ыытыллыахтааҕын, урааҕа бэс ыйыгар тахсарын туһунан этилиннэ.
Афанасий Сектяев