Бүгүн улуус баһылыга Василий Алексеев, улуус баһылыгын бастакы солбуйааччы Семен Бурнашев быйылгы дьылга улуус нэһилиэктэригэр котельнайдар туруктарын, балаһыанньаларын билсээри мунньах ыыттылар.
Быйылгы оттук сезонугар улууспутугар итиинэн хааччыйар 9 тэрилтэ үлэлиир, олортон «СӨ ДьУоКХ» ГУТ Уус Алданнааҕы филиала 46 котельнайы оттор, о.и. убаҕас оттугунан 4, таас чоҕунан 42, уонна 5 тепловой пууну көрөр-истэр. Ону таһынан «ТМС+», «Арматэк», «Спецсервис» ХЭТ, «Тагасова М.Р.» ИП, «Альтернатива», «Теплосеть+», «Армон», «Намкоммунтепло» ХЭТ чааһынай котельнайдара үлэлииллэр.
Улуус салалтата эһиилги кыстыкка саахал тахсыбатын туһугар эрдэттэн үлэни ыытар инниттэн бары тустаах салайааччылары ыҥыран котельнайдар билиҥҥи туруктарын билистилэр.
Онуоха кинилэри саамай долгутар боппуруоһунан эһиилги кыстыкка хааччыныахтаах чохторун атыылаһыы уонна таһаҕастааһын буолар. Манна субсидия харчыта хойутаан уустуктары үөскэтэрин этэн, кэмигэр төлөнөрүн хонтуруоллуурга туруорустулар.
Билиҥҥи туругунан, саамай уустук балаһыанньалааҕынан Тулунаҕа «Теплосеть+» ХЭТ котельнайа буолар. Кинилэр оһохторо олох эргэрэн, быйыл сайын уларыйбатаҕына, эһиил кыстатар кыаҕа суоҕун эттилэр.
Урбаанньыт Марфа Тагасова «Дороги Усть-Алдана» котельнайын ылан үлэлэппитэ үһүс сыла. Ааспыт күһүн саҥа котельнайы туппуттара. Ол гынан баран, оһохторо эргэ буоланнар, эбии икки саҥа оһоххо наадыйарын эттэ, ол кыалыннаҕына, өссө кэҥиир кыахтаахтарын иһитиннэрдэ.
Мунньахха салайааччылар бары санааларын аһаҕастык үллэһиннилэр. Улуус баһылыга Василий Алексеев билиҥҥи уустук кэмҥэ этэҥҥэ үлэлии олороллоругар махталын тиэртэ, инникитин бу курдук кэлэн кыһалҕаларын туруорсан, эрдэттэн баар итэҕэстэри туоратан иһэргэ биир санаанан үлэлииргэ ыҥырда. Бары этиилэр боротокуолга киирэн, улуус салалтатын тус хонтуруолугар ылылыннылар.
Улуус дьаһалтатын пресс-сулууспата