Аҕа дойду Улуу сэриитин Кыайыытын 81-с сылын бэлиэтиибит. Ол тухары сэрии ыар тыына хас да көлүөнэ өйүттэн-санаатыттан сүппэт. Биһиги улуустан 2372 киһи уоттаах сэриигэ аттаммыта, кинилэртэн 1293 киһи кыргыһыы толоонугар олоҕун толук уурбута, 1208 киһи Кыайыы көтөллөөх, төрөөбүт алаастарыгар төннүбүттэрэ.
Билигин улууска 30 тыыл бэтэрээнэ, 2 сэрии огдооболоро, 218 сэрии сылын оҕолоро олороллор. Кинилэр сут-кураан, аччыктааһын ыар сылларыгар «Тугу барытын фронт туһатыгар, Кыайыы туһугар» диэн күнүһү-түүнү аахсыбакка үлэлээн, Кыайыыны уһансыбыттарыгар махтанабыт, сүһүөхтээх бэйэбит сүгүрүйэбит!
Быйылгы Кыайыы нэдиэлэтин бэлиэтээһинигэр муус устар 24 күнүттэн ыам ыйын 9 күнүгэр диэри араас хабааннаах тэрээһиннэр ыытылла тураллар. Бу тэрээһиннэр чэрчилэринэн улуус дьаһалтата улуустааҕы бэтэрээннэр Сэбиэттэрин кытары бииргэ үлэлээһиҥҥэ сөбүлэҥ түһэрсэн, Аҕа дойду Улуу сэриитин кыттыылаахтарын үйэтитиигэ салгыы кэскиллээх үлэлэр ыытыллыахтара.
Билиҥҥи кэмҥэ буола турар анал байыаннай дьайыыга аҕа көлүөнэ холобурун тутуһан Ийэ дойдуларын туһугар олохторун толук уурбут буойуттарбытын ахтан ааһарбыт тоҕоостоох. Кинилэр ааттара үйэ тухары ааттаныа, кэнчээри ыччакка холобур буолуо. Бүгүҥҥү күҥҥэ эйэлээх олох эргийэн, анал байыаннай дьайыыга сылдьар буойуттарбыт этэҥҥэ дойдуларыгар кэлэн, дьоллоох олох туһугар үлэни-хамнаһы ыытарбыт барыбыт баҕа санаата.
Өссө төгүл бар дьоммутун Улуу Кыайыы бырааһынньыгынан улуус дьаһалтатын уонна тус бэйэм ааппыттан истиҥник эҕэрдэлиибин! Баҕарабыт хас биирдии дьиэ кэргэҥҥэ чөл туругу, дьоллоох, байылыат олоҕу!
Уус Алдан улууһун баһылыга Василий Алексеев