Атырдьах ыйын 22–27 күннэригэр Улан Удэҕэ остуол тенниһигэр ветераннарга М.Б. Митыпов кэриэһигэр аһаҕас турнирга биир дойдулаахпыт Ирина Басыгысова, Аркадий Иванов, Зульфия Афонская (Протопопова) ситиһиилээхтик кытыннылар.
Бу туһунан Ирина Константиновна:
– Бу күрэскэ кытайдар, монголлар, бүрээттэр, Забайкальскай кыраай олохтоохторо уонна сахалар – барыта 105 теннисист 40-49, 50-59, 60-64, 65-69, 70-74, 75 үөһээ саастаахтар диэн арахсан кытынныбыт. Онон бэйэтэ норуоттар икки ардыларынааҕы таһымнаах улахан күрэс буолла.
Хаһыс да сылын ыытыллар турнир эбит. Күрэхтэһии олус тэрээһиннээхтик барда, атырдьах ыйын 25 күнүгэр диэри күрэхтэһиннэрэн баран, 26-ка Байкалы көрдөрдүлэр. Үрдүгэр түһэн, онно аһаан, хонон биһиэхэ, ветераннарга, табыгастаах усулуобуйаны барытын тэрийдилэр. Мин кытайдар оонньууларын көрүөхпүн уруккуттан баҕарар этим, ол ыра санаабынан кынаттанан кыттан, 70-74 саастаахтарга 2-с миэстэ иһин мэтээл кэтэн астынан аҕай төннөн эрэбин.
Муҥутуур кыайыылааҕы быһаарар күрэскэ эр дьоҥҥо уонна дьахталларга кытайдар иннилэрин кимиэхэ да биэрбэтилэр. Биһиги, сахалар, хамаанданан күрэскэ – 3-с, кытайдар – 2-с, бүрээттэр 1-кы буоллулар.
Саха сирин теннисистэрэ биирдиилээн киирсиилэргэ барыта 19 мэтээли ситистибит. Сыырдаахтан төрүттээх Зульфия Афонская (Протопопова) 40-49 диэри саастаахтарга, улууспут чиэһин куруук көмүскүүр Аркадий Иванов 65-69 саастаахтарга чемпион үрдүк аатын сүктүлэр. Онон уус алданнар үһүөн мэтээллээх кэллибит.
