Ааспыт сылга Россияҕа педагогтарга, уһуйааччыларга ананан үгүс үлэ ыытыллыбыта, үп-харчы да көрүллүбүтэ. СӨ Ил Дарханын Гранын кыайыылааҕа буолбут «Уһуйааччы сэһэнэ – дойду историята» бырайыак чэрчитинэн Саха сирин пионерскай тэрилтэтэ төрүттэммитэ 100 сылыгар анаан пионерскай үлэни салайсыбыт, баһаатайдаабыт куоракка олорор биир дойдулаахтарбытын кытта көрсүһүү, ахтыыларын устуу ыытылынна. Бырайыак ааптара – «Өркөн» оҕону эбии үөрэхтээһин киинин педагога Евдокия Окоемова салалтатынан оскуола үөрэнээччилэрэ, киин педагогтара сарсыардаттан киэһээҥҥэ диэри үлэлээтилэр.
Кыыһар кыһыл хаалтыстаах баһаатайдар профсоюзтар Федерациятын дьиэтигэр муһуннулар. Кэлбит баһаатайдары пионер, хомсомуол, партия үлэтин бэтэрээнэ, оройуоннааҕы пионерскай тэрилтэ сэбиэтин бэрэссэдээтэлинэн, хомсомуол, партия райкомнарын сэкирэтээринэн үлэлээбит СӨ норуот хаһаайыстыбатын үтүөлээх үлэһитэ, Уус Алдан улууһун бочуоттаах гражданина Зинаида Винокурова истиҥник эҕэрдэлээтэ, Саха сирин пионерскай тэрилтэтин 100 сыллаах үбүлүөйүн улууска тэрээһиннээхтик ыыталларыгар баҕарда. Зинаида Дмитриевна Саха сирин пионер уонна хомсомуол тэрилтэлэрин үлэлэрин сэһэргиир хомуйбут ахтыыларыттан, үгүс ахсааннаах хаартыскалартан турар бэйэтэ оҥорон таһаартарбыт «Я теперь вспоминаю как песню…» кинигэтин (2022 с.) үөрэммит Мүрү 1 нүөмэрдээх орто оскуолатын музейыгар бэлэхтээтэ.
Пионербаһаатайдар көрсүһүүлэригэр Мүрү аҕыс кылаастаах оскуолатыгар старшай пионербаһаатайдаабыт Сталина Данилова, убаастыыр салайааччыбыт, баһаатайбыт Зинаида Винокурова, Өспөххө өр сылларга учууталлаабыт, эдэр сааһыгар баһаатайдаабыт Елизавета Ильина, Тиит Арыы, Бэйдиҥэ оскуолаларыгар баһаатайдаабыт Зоя Егорова, Лөгөй орто оскуолатын баһаатайа Зоя Желобцова, Найахы орто оскуолатын баһаатайа, СӨ үтүөлээх учуутала Надежда Белолюбская, Майаҕас, Өспөх аҕыс кылаастаах оскуолаларыгар баһаатайдаабыт Мария Ноговицына, пионерскай тэрилтэни ахсаабакка, сырдатааччы, Чурапчы Мугудайыгар олорор Дүпсүнтэн төрүттээх Людмила Оконешникова оҕо саастарын, оскуолатааҕы кэмнэрин, пионердары кытта үлэлэрин туһунан өрө көтөҕүллэн олорон сэһэргээтилэр.
Пионерскай тэрилтэ оччотооҕу сэбиэскэй кэм оҕолорун үтүөҕэ, сырдыкка уһуйбут биир сомоҕо күүстээх оҕо коммунистическай хамсааһына буоларын өссө төгүл бигэргэттилэр. Ааспыт оҕо сааска төннөн тэҥҥэ долгуйан, үөрэн ыллыбыт, пионердар кутаа уоттарын кыыма сүрэхпитигэр хаттаан күөдьүйдэ.
Елена Сыроватская, уопсас. кэрэсп.