Мүрү 1-кы №-дээх орто оскуолатыгар кылаастарынан СӨ Ийэ күнүгэр аналлаах тэрээһиннэр бэрт сонуннук ыытылыннылар, ийэлэри үөртүлэр, онтон оҕолор астыннылар.
9 «б» кылааска (кылаас салайааччыта Федора Бурнашева) «Ийэ барахсан оҕотунаан бииргэ» диэн уруок таһынааҕы тэрээһин сэргэхтик барда. Икки чаастан турар тэрээһиҥҥэ бастаан кылаас оҕолоро ийэлэри эҕэрдэлээтилэр, аҕыйах музыкальнай нүөмэри кыһаллан туран толордулар, ол кэнниттэн минньигэс астаах остуолу тардан ийэлэрин күндүлээтилэр.
Иккис чааһынан оскуола омук тылын учууталын, айымньылаахтык үлэлиир, ураты суоллаах-иистээх бэйэ дьарыктаах Варвара Бурцеваны ыҥыран маастар-кылаас ыыттардылар. Кылаас 15 төрөппүтэ, 18 оҕото футболкаҕа термопластика тиэхиньикэтинэн араас ойуулары түһэрэн, бэйэлэригэр бу күҥҥэ бэлэх оҥоһуннулар. Варвара Николаевна эрдэ бэлэмнээн оҕо ийэтинээн хаартыскаларын, анал суруктары аҕалбытын илдьэ кэлбит футболкаларыгар түһэрдилэр.
Маастар кылааска кыттыбыттар бары олус астынан Варвара Николаевнаҕа сонун маастар-кылааһын иһин махтаннылар, айымньылаах үлэтигэр үрдүк ситиһиилэри баҕардылар.
Елена Сыроватская, уопсас. кэрэсп.