Бүгүн ыам ыйын 18 күнүгэр Түмэллэр аан дойдутааҕы күннэрин уонна Улуу Кыайыы өрөгөйдөөх 80 сылынан Сэһэн Ардьакыап аатынан улуус историятын уонна кыраайы үөрэтэр мусуойга (дириэктэр Павел Пермяков) «Воинская слава – гордость поколений» саҥа саала олохтонно. Мусуойга Аҕа дойду Улуу сэриитин ыар сылларын уонна гражданскай сэриини кэпсии-ипсии турбут муннуктар өссө хаҥатыллан, көстүүтэ тупсарыллан итиэннэ буола турар байыаннай дьайыыга биир дойдулаахтарбыт кыттыыларын көрдөрөр стендэ, экспонаттар эбиллэннэр, сэрии тиэмэтигэр хас да салааҕа араарыллан, сааһыланан барыта бу саалаҕа түмүлүннэ. Онон бу саала дойду, сырдык олох иһин хорсуннук турууласпыт дьоммут сырдык ааттарын үйэлэргэ сэһэргии туруоҕа.
Саала үөрүүлээх арыллыытыгар Мүрү нэһилиэгин баһылыга Прокопий Румянцев, бэтэрээннэр улуустааҕы сэбиэттэрин бэрэссэдээтэлэ Олег Федоров, “Биир ньыгыл Россия” баартыйа улуустааҕы салаатын сэкирэтээрэ Василий Аммосов, култуура салалтатын начаалынньыга Сергей Нафанаилов, байыаннай дьайыы улуустааҕы куратора Иннокентий Троев, кыраайы үөрэтээччи Федот Бысыин, Курскай Тоҕойдооҕу уонна Ленинград иһин сэрии кыттыылааҕа Афанасий Иванович Федоров хос сиэнэ, Мүрү 1-гы №-дээх орто оскуолатын үөрэнээччитэ 7-с “б” кылааһын үөрэнээччитэ Дамир Платонов уо.д.а. кыттыыны ыллылар. Кэлбит ыалдьыттарга мусуой научнай үлэһитэ Зоя Белолюбская аан тылы этэн туран, урукку кэмнэртэн турбут сэрии уонна Уус Алдан дьоно экспозициялары кэпсээтэ, оттон саҥа турбут экспонаттар туһунан түмэл экскурсовода Александр Сивцев, Федот Бысыин, Дамир Платонов сырдаттылар.
Байыаннай дьайыы туһунан кэпсиир стендэни уонна экспонаттары байыаннай дьайыы кыттыылаахтара Станислав Кирилин уонна Михаил Слепцов, саала бырайыагар үлэтин туһунан Павел Пермяков билиһиннэрдилэр. Оттон байыаннай дьайыыга сырдык тыынын толук уурбут байыас ийэтэ Светлана Аржакова эҕэрдэ тылы этэн туран, саала салгыы сайдарыгар 10 тыһыынча солкуобайы бэлэх уунна.
Мария АРГУНОВА
Түмэл хаартыскалара, видеота