Биир дойдулаахпыт саха народнай поэта, оҕо суруйааччыта, суруналыыс Иван Мигалкин – Кэрэл төрөөбүтэ 70 сылыгар анаан ыытыллыбыт «Оҕо мичээрэ, оҕо үөрүүтэ» диэн өрөспүүбүлүкэтээҕи онлайн уус-уран ааҕыы күрэһигэр Бороҕон нэһилиэгиттэн Черкашиннар үс көлүөнэ дьиэ кэргэн биһирэбил анал аатынан, улуустааҕы «Алааһым арылы кустуга» квиз, онлайн оонньууга Сюзанна, Константин Петуховтар дьиэ кэргэттэрэ кыттан, иккис миэстэни ылан кыайыылаахтарынан ааттаннылар.
Бу улахан киэҥ далааһыннаах күрэстэргэ кытыннарарбытыгар библиотеканы кытта ыкса ситимнээхтик үлэлэһэр В.М. Прокопьев аатынан Тумул орто оскуолатын алын сүһүөх кылаас учууталлара ааҕыыны көҕүлээн кытыннараллар. Ол курдук, Раиса Софронова кылаас таһынан ааҕыыны көҕүлээн оҕо суруйааччыта Иван Мигалкин 60 сааһын бэлиэтиир дьоро литературнай биэчэргэ «Мүрүм хатыҥ чараҥар» кылааһынан кыттан хоһоон күрэһэр иккис миэстэни ылбыттара. 2014 сыллаахха опера уонна балет государственнай театрыгар Иван Мигалкин «Сир ийэни сырдыгынан күндүлүү» диэн махтал киэһээтигэр 2 кылаас үөрэнээччилэрэ бу улахан тэрээһиҥҥэ ыҥырыллан кыттыбыттара. 2014 сыллаахха «Алааһым арылы кустуга» викторинаҕа кылааһынан кыттан үһүс миэстэ кыайыылаахтара. Раиса Егоровна кылааһын оҕолоругар «Кинигэни таптааччылар», » Имигэс тарбахтар» куруһуоктары салайар. Иван Мигалкин хоһоонноругар сөп түбэһиннэрэн, араас паннолары оҥотторон, «Иван Мигалкин хоһоонноругар айылҕа – оҕо хараҕынан» диэн методическай брошюра оҥорбута.
Улууска алтынньы 17 күнүгэр «Сир ийэни сырдыгынан күндүлүү… » диэн түмүктүүр тэрээһин буолан ааста. Бу тэрээһиннэргэ кыттарбытыгар библиотеканы кытта ыкса сибээстээхтик үлэлэһэр алын кылаас учууталыгар Раиса Софроноваҕа, төрөппүттэргэ, үөрэнээччилэргэ нэһилиэк библиотекатын аатыттан махтанабын.
Оҕо суруйааччыта И.В. Мигалкин айыньыларынан кытыннарбыт күрэхтэрин ситиһиилэрэ, медиапрезентационнай матырыйаалга таҥыллан, улуустааҕы оҕо библиотекатыгар электроннай фонда буолан үйэтитилиннэ.
Светлана Прудецкая