Бүгүн сарсыардаттан социальнай ситим устун «Снова возвращают к печному отоплению» диэн автора суох сурук тилийэ сүүрдэ. Онно түөрт сыл устата Тулуна бөһүөлэгин аҥаарын ититиинэн хааччыйан олорбут чааһынай тэрилтэ хаһаайына хоромньуга баран, үлэтин тохтоторун, онуоха мөлүйүөнүнэн иэскэ олорор ДьУоКХ улуустааҕы филиала ититии ситимин бэйэтигэр ыларын аккаастаммытын туһунан кэпсэнэр. Онон олохтоохтор салгыы оһох оттууга төннөр буоллулар диэн ыйыллыбыт.
Бу сурах төһө оруннааҕын II Лөгөй нэһилиэгин баһылыга Петр Бурнашевтан ыйыппыппытыгар, маннык хоруйдаата:
– Оруна суох, сымыйа сурах. Тулуна бөһүөлэгин аҥаарын «Теплосеть+» чааһынай тэрилтэ хааччыйан олорор. Быйыл субсидия агентствота субсидия харчытын төлөөбөккө, күчүмэҕэйдэри үөскэттэ эрээри, үлэ тохтуурун туһунан туох да боппуруос турбатаҕа.
Мария АРГУНОВА