Василий Яковлев Кэптэнигэ Саха-Бельгийскэй гимназияҕа үөрэнэ сылдьан тенниһинэн сөбүлээн дьарыктаммыт. Ол саҕана аҕата Павел Яковлев уонна биир дойдулааҕа Петр Петухов уолу уһуйан утумнаахтык дьарыктаабыттар. Билигин бэйэтэ Бороҕоҥҥо кэлэн оҕолору теннискэ дьарыктаан саҕалаабыта үһүс сылыгар барда.
Василий Павлович:
– Теннис дьарыгар сылдьарга оҕо умсугуйара наада уонна төрөппүт өйөбүлэ ирдэнэр. Сыл аайы 50-ча оҕо сылдьар. Сүрүннээн 1-кы кылаастан 8-с кылаастарга диэри оҕолору бөлөхтөргө арааран эрчийэбин, ол эрээри былырыын уһуйаан иитиллээччилэрин, ончу кыралары эмиэ дьарыктыы сылдьыбытым. Оҕо төһөнөн кыратыттан дьарыктанар даҕаны, соччонон улаатарыгар ситиһиитэ эмиэ улаатан иһэр. Оҕо этэ-сиинэ, өйдөнөрүн курдук эттэххэ, пластилин курдук буоллаҕа, ону кыра эрдэҕиттэн нээллээн, эрчийэн бардахха быдан таһаарыылаах түмүктэри көрдөрүөн сөп. Кыра оҕолор остуолу да өҥөйөн көрбөттөрө буолуо дии санаамаҥ, кинилэргэ анаан остуолбутун намтатан биэрэбит, сүрүнэ, ракетканан үлэлии үөрэниэхтээхтэр.
Оҕолорбут сыл аайы ситиһиилэнэллэр. Табылларынан, үөрэх дьылын кэмигэр иккилии нэдиэлэ быысаһан күрэстэри кэрийэбит. Бастакы сылларга оҕолору барыларын соһор этим: оҕо хотторуу да аһыытын, кыайыы кынаттыыр да күүһүн билэ улаатыахтаах диэн санааттан. Кэлин күрэс балаһыанньатыгар сөп түбэһэр оҕолору сүүмэрдиир буолбутум.
Быйыл саас улахан ситиһиилэннибит – Камила Попова уонна Саина Готовцева Уһук Илиҥҥи федеральнай уокурук тенниһын күрэһигэр 14 саастарыгар диэри оҕолорго боруонса призер буолан кэлбиттэрэ. Өссө теннис дьарыгар сылдьыбыт оҕолор сайын Бурятия лааҕырыгар сынньана сылдьан, теннис күрэҕин тэрийбиттэригэр үгүстэрэ ситиһиилэммиттэрэ.
Уус Алдаҥҥа теннис федерацията тэриллибитэ. Бэрэссэдээтэлинэн “Спецсервис” ХЭТ салайааччыта Евгений Павлов талыллыбыта. Кини тус бэйэтэ уонна федерациябыт биһиги күрэскэ барар айаммыт төлөбүрүн толуйан олуһун абырыыр. Түгэни туһанан, махталбытын биллэрэбит.
Быйылгы үөрэх дьылыгар теннис куруһуога арыллыаҕа. Сыл аайы кэҥээн иһэбит, номнуо алта остуолланныбыт. Өссө биир тренер үлэлии кэлиэҕэ – Алина Никифорова. Иккиэн аттараммыт баҕалаах оҕолору барыларын дьарыктыырга кыһаллыахпыт.
Эдэр тренер Василий Яковлев дьарыктыыр оҕолорун туһунан киэн тутта кэпсиириттэн сэрэйдэххэ, үлэтин олус таптыыр, ылсыбыт идэтигэр бэриниилээх, кыһамньылаах эбит. Уус Алдаҥҥа Саха сирин ааттаппыт улахан теннисистэр иитиллэн тахсыбыттара, инникитин да тахса туруохтара диэн эрэллээхпит. Дьарыкка суруттарыы билигин да бара турар, ол эрээри миэстэ хааччахтаах, 89142388150 нүөмэргэ эрийэн, Василий Павловичтыын билсэн суруйтарыаххытын сөп.