Отчуоттуур иккис бөлөх бүгүн Байаҕантай уонна II Лөгөй нэһилиэктэригэр сырытта.
Тандаҕа тиийэн, кэпсээнтэн иһиттэххэ, тутуу бөҕөтө бара турар курдук. Онтон биирэ да ситэриллэ илик. Улахан кыамталаах хочуолунай тутуллан иһэн, өрөспүүбүлүкэтээҕи ДьУоКХ уустук балаһыанньаҕа киирэн, үлэ тохтообут. Ону олохтоохтор быйыл ситэрэ охсон Үлэ Дьоруойа Михаил Готовцев 80 сааһынан Танда бөһүөлэгэ 100 бырыһыан киинтэн ититиигэ киирэрин туруорустулар. Тутулла турар хочуолунай бөһүөлэги толору итиинэн хааччыйар кыахтаах эбит. Спортсаала тутуутун бэдэрээччит бэйэтин үбүнэн быйыл бүтэрдэҕинэ, бырабыыталыстыба ону төнүннэрэргэ эрэннэрбит. Ити барыта мунньах боротокуолугар киирдэ.
Бу нэһилиэк иһэр, туттар уунан улаханнык эрэйдэнэр. Үрэх сирдээх буолан, уу уһуннук тохтообот. Ол иһин быһыт оҥоһуутун туруорустулар. Бу тутуу бырайыага, симиэтэтэ барыта оҥоһуллан бэлэм эбит. Онон үп көһүннэр эрэ үлэ саҕаланыа диэн буолла. Ону тэҥэ үрэх дулҕатын, талаҕын ыраастыыры туруорустулар.
Тулунаҕа “Тепло+” диэн чааһынай хампаанньа бөһүөлэк аҥаарын ититиинэн хааччыйар. Бу хампаанньа субсидия ылбакка, ыарахан балаһыанньаҕа киирэн, үлэһиттэригэр хамнастарын кыайан төлөөбөккө олорор эбит. Онон олохтоохтор маны болҕомтоҕо ылан көмө оҥороллоругар, хочуолунайын саҥардыыга үлэ барарын туруорустулар.
Атын нэһилиэктэргэ эппиттэрин курдук ыанар ынах төбөтүгэр бэриллэр харчы сарбылларыгар сөбүлэспэттэрин биллэрдилэр. Өскөтүн, үүт туттарыытыгар барар буоллахтарына, үүт астыыр сыах баар буолуутун туруорустулар. Онон манна улуустааҕы тыа хаһаайыстыбатын управлениетын исписэлиистэрэ боппуруоһу атах тэпсэн олорон быһаарсарга кэлиэх буоллулар.
Уус Алдан улууһун дьоно сүрүн дьарыкпыт тыа хаһаайыстыбатынан дьарыктаныы буолар. Онтон дохуот аахсыахтаахпыт, аһаан-таҥнан олоруохтаахпыт. Ол иһин хас биирдии уларыйыы киириитэ нэһилиэнньэни кытары кэпсэтиһэн баран быһаарыллара ордук.
Афанасий Сектяев