Байаҕантай нэһилиэгин “Кэнчээри” уһуйааныгар 14-с сылын педагогическай үлэ ветерана, “РФ үөрэхтээһинин туйгуна” Готовцева Розалия Николаевна бирииһигэр хабылык, иэрэгэй национальнай остуол оонньуутугар ыытыллар аһаҕас турнир 3 саастаах оҕолортон саҕалаан алын кылаас оҕолоро кыттыылаах буолан ааста.
Сылын аайы оҕолор оонньуур таһымнара тупсан иһэрин бэлиэтиибит уонна оонньооччу өрөспүүбүлүкэ үрдүнэн элбээн эрэрэ үөрдэр. Бу аата өбүгэ оонньуулара сүппэт, симэлийбэт оҥоһуулаахтар диэн бэлиэтэнэр.
Бу дьыл ыам ыйын 13-14 күннэригэр ыытыллыбыт күрэс кытааччытын ахсаана – 171 эдэр спортсмен. Өрөспүүбүлүкэбит араас муннуктарыттан, о.э. Үөһээ Бүлүү, Мэҥэ Хаҥалас (Тиэлиги), Чурапчы, Чурапчы (Төлөй-Дириҥ), Горнай (Бэрдьигэстээх), Сунтар (Бордоҥ), Уус Алдан (Кэптэни, Бороҕон, Танда, Найахы, Бэйдиҥэ), Амма, Кэбээйи, Нам улуустарыттан уонна Дьокуускай куораттан (ДЮСШ-9) күөн көрүстүлэр. Оҕолор олус үрдүк таһымнаах оонньуулары көрдөрөн өссө төгүл сөхтөрдүлэр. 72 хабылыксыттаах, 148 иэрэгэй көрүҥэр кыттааччылаах тыҥааһыннаах күрэс күннэрэ аастылар.
Оскуола алын саастаах оҕолорун икки ардыларыгар хабылык көрүҥэр Сунтар улууһун Бордон, Чурапчы, Чурапчы Төлөй нэһилиэктэрэ, Мэҥэ Хаҥалас Тиэлиги, Дьокуускай куорат ДЮСШ-9 бастыҥ көрдөрүүлэх таҕыстылар. Уһуйаан иитиллээччилэрэ Уус Алдан улууһун Найахы, Чурапчы Төлөй, Амма, Горнай Бэрдьигэстээх нэһилиэктэрэ таһыччы оонньуулары көрдөрдүлэр. Маны таһынан иэрэгэй көрүҥэр кыра саастаах, о.э. үстээх кырачааннартан саҕалаан Уус Алдан Балыктаах, Чурапчы, Бороҕон “Сардаана”, Танда, Амма уһуйааннарын оҕолоро бастыҥ оонньуулары көрдөрөн үөрүү өрөгөйүн биллилэр.
Кыайыылаахтарга барыта 48 мэтээл оонньонно. Танда уһуйаанын иитиллээччилэрэ – 6 саастаах Дуня Назарова – хабылыкка 3-с миэстэ, иэрэгэй көрүҥэр 1-кымиэстэ, Антон Прокопьев – 1-кы миэстэ, Эрчим Булдаков – 1-кы миэстэ, Роберт Вензель – 2-с миэстэ, Вера Вензель, Кира Вензель 3-с миэстэ буоллулар.
Күрэс онлайн форматынан ыытылынна. Бары кыттыбыт кырачаан спортсменнарбыт тренердэригэр улахан махталбытын тиэрдэбит. Маннык форматынан күрэс таһыма үрдээн, биир да моһолу көрсүбэккэ тып-тап курдук ааста.
Өбүгэ оонньуута иитии биир көрүҥэ буоларын чопчулуур, оонньуу барыбытын түмэр этиинэн сиэттэрэн барыгытын көхтөөхтүк дьарыктаныҥ, өбүгэ оонньуутун таптааҥ, сөргүтүҥ, бары бииргэ буолуохха диэн ыҥырабыт!
Тэрээһиҥҥэ сылын аайы күүс-көмө буолар биһиги Розалия Николаевнабыт оҕолоругар, бииргэ төрөөбүт балтыгар Анисия Николаевнаҕа улахан махталбытын биллэрэбит.
Светлана Аммосова, Танда бөһ. “Кэнчээри” уһуйаанын бас иитээччитэ