Бэрт Ууһун нэһилиэгэр Россияҕа норуоттар сомоҕолоһууларын, Саха Өрөспүүбүлүкэтигэр култуура, улууска Түмсүү уонна бииргэ үлэлээһин, нэһилиэккэ бөһүөлэк төрүттэммитэ 80 сылларыгар анаан олохтоох библиотекаҕа ааҕааччылары көҕүлүүр, билиини-көрүүнү тургутар сыаллаах «ТАЛ. ТААЙ. ТАП» өркөн өй оонньуу хамаанданан күрэһэ ыытылынна.
Күрэһи түөрт ый устата «Эйэҕэс эбэлэр» түмсүү (салайааччы Альбина Неустроева) уонна олохтоох библиотекарь Пелагея Парникова ыыттыбыт. Оонньууга тэрилтэлэртэн, түмсүүлэртэн, нэһилиэк баҕалаах дьонуттан үстүү киһилээх хамаандалар тэриллэн, сэрэбиэй быһыытынан 1-кы түһүмэххэ аҕыс хамаанда кыттыбыта. Оонньооччуларга Бэрт Ууһуттан төрүттээх – Балаҕаннаахтан М.Е. Москвитина, Бороҕонтон И.И. Бурнашева кыттан көх-нэм буоллулар.
Хамаандалар оонньуу аайы 25-тии ыйытыылаах 10 тиэмэҕэ кииристилэр, ол эбэтэр барыта 500 ыйытыыга хоруйдаатылар. Хас биирдии тиэмэҕэ спонсордар туруорбут бириистээх ыйытыылара оонньоннулар. Элбэх бааллаах үс хамаанда ыам ыйын 14 күнүгэр түмүктүүр оонньууга күөн көрүстэ.
Чыпчаал кыайыылааҕынан Матрена Москвитина, Диана Неустроева, Ньургуйаана Копырина састааптаах хамаанда таҕыста. Илья Ильин, Гаврил Пухов, Александр Березкин састааптаах хамаанда иккис миэстэни ылла. Үһүскэ Василий Черкашин, Лидия Лебедева, Варвара Иванова таҕыстылар.
Кыайыылаахтарга хайҕал суруктар, мэтээллэр, өйдөбүнньүк саха оҥоһуга бириистэр, бары кыттыбыттарга туоһу суруктар, спонсордарбытыгар махтал суруктар, буклеттар туттарылыннылар.
Спонсордарбыт: И.П. Ильин – Бэрт Ууһун нэһилиэгин баһылыга, М.И. Куличкина – Аллараа Бэстээхтээҕи М.Е. Попов аатынан орто оскуола математикаҕа учуутала, Л.Г. Лебедева – «Сыырдаах» бэтэринээрийэ учаастагын сэбиэдиссэйэ, Н.В. Бурцева – В.В. Алексеев аатынан Мүрүтээҕи «Уолан» гимназия саха тылын уонна литературатын учуутала, М.М. Петрова – И.С. Портнягин аатынан Сыырдаах орто оскуолатын директора, Н.А. Алексеева – Жатайдааҕы техникум методическай кабинетын салайааччыта, Л.Л. Бурцева – А.П. Иванов аатынан норуот айымньытын киинин директора, В.М. Иванова – социальнай үлэһит, М.С. Иванова – «Чуораанчык» оҕо уһуйаанын сэбиэдиссэйэ, А.Л. Неустроева – «Эйэҕэс эбэлэр» түмсүү салайааччыта, П.Е. Парникова – олохтоох библиотека сэбиэдиссэйэ буоллулар.
Онон бириистээх 11 ыйытыы оонньонно.
«Эйэҕэс эбэлэр» түмсүү, олохтоох библиотека ыытар тэрээһиннэригэр өйөбүл, күүс-көмө, буолар спонсордарбытыгар, өркөн өй күрэһигэр кыттыбыт бары хамаандаларга биһиги ыытар тэрээһиннэрбитигэр өрүү көхтөөхтүк кыттаргыт иһин махтанабыт. Бука барыгытыгар үлэҕэ ситиһиилэри, уҕараабат эрчими, үрдүк тэтимнээх үлэни-хамнаһы баҕарабыт.
Пелагея Парникова, Бэрт Ууһун нэһилиэгин модельнай библиотекатын сэбиэдиссэйэ