Дьиэ кэргэн сылынан, Ийэлэр күннэринэн Бэрт Ууһун нэһилиэгэр саҕаламмыт “Дьиэ кэргэн – мин биһигим” декада чэрчитинэн эдэр ийэлэргэ анаан станцияларынан оонньуу тэрилиннэ. Бэрт интэриэһинэй ис хоһоонноох түһүмэхтэргэ ийэлэр үөрэ-көтө кыттан, күннээҕи түбүктэн дуоһуйа сынньанан тарҕастылар.
Үс түөлбэттэн түөртүү эдэр ийэ уонна биир хомуур хамаанда илин-кэлин түсүһэн, бары даҕаны остуол оонньууларыгар, ыраахха быраҕыыга, сыалы табыыга, тарбах талааныгар, түргэн туттууга, өйү тургутууга эгил-тэгил күрэхтэстилэр. Түмүккэ кыайыылааҕынан «Ийэ мичээрэ» («Эрчим» түөлбэ) таҕыста. «Кэрэ Куолар» («Саһарҕа» түөлбэттэн) – II, «Супер мамы» хомуур хамаанда – III, «Дьүкээбил» («Дьүкээбил» түөлбэ) IV миэстэлэри үллэһиннилэр.
Оонньууну «Эйэҕэс эбэлэр» түмсүү уонна олохтоох библиотека тэрийдилэр, «Эйэҕэс эбэлэр» түмсүү эбэлэрэ инникитин эдэр ийэлэр, дьиэ хаһаайкалара общестеннай үлэҕэ көхтөөх буолалларыгар баҕа санааларын тиэртилэр, бэлиэ суруктары, сэмэй бэлэхтэри туттардылар.
Пелагея Парникова, олохтоох библиотекарь