Сыырдаахха «Дьиэ кэргэним – мин биһигим» тиэмэлээх нэдиэлэҕэ А.П. Иванов аат. норуот айымньытын киинигэр Саха сиригэр Ийэ, Россияҕа Аҕа күнүгэр аналлаах эҕэрдэ тэрилиннэ.
Кэнсиэр Г.В. Бурцева салалтатынан орто оскуола оҕолоро «Ийэҕэ махтал» уус-уран дьүһүйүүлэринэн саҕаланна. Баһылык Илья Ильин нэһилиэк ийэлэрин уонна аҕаларын эҕэрдэлээтэ, Матрена Тарскаяҕа улууска тыа хаһаайыстыбатын сайыннарыыга киллэрбит кылаатын иһин анал бэлиэни туттарда, үбүлүөйдээх дааталаах Клара Колодезниковаҕа нэһилиэк баһылыгыттан, үлэлээбит ветеринарнай сулууспатыттан Л.Г. Лебедева уонна социальнай үлэһит В.М. Иванова эҕэрдэ суруктары кытта өйдөбүнньүк бэлэхтэрин туттардылар. Нэһилиэк олоҕор көхтөөхтүк кыттар ийэлэргэ А.А. Бурцеваҕа, З.Р Гоголеваҕа баһылык махтал суруга туттарылынна.
Нэдиэлэ устата түмсүүлэр, коллективтар тэрийиилэринэн араас интэриэһинэй тэрээһиннэр ыытылыннылар. Ол курдук «Сайылык Далбардара» түмсүү салайааччы З.Д. Петрова, библиотекарь П.Е. Парникова салалталарынан араас хайысхалаах тэрээһиннэр буоллулар . Ол курдук бэйэ илиитинэн оҥоһуллубут оҥоһуктар быыстапкалара, күрүчүөгүнэн баайыыга, оҕуруонан тиһиигэ, саха сонун тигиигэ маастар кылаастар, оскуола оҕолоругар видеоролик устуутугар уонна «Эйэҕэс эбэлэр»түмсүүнү салайар А.Л. Неустроева салалтатынан эдэр ийэлэргэ оонньуу ыытылыннылар. Бу тэрээһиннэргэ кыттыбыттарга уонна кыайыылаахтарга кэнсиэр кэмигэр үөрүүлээх быһыыга өйдөбүнньүк бэлэхтэри туттардылар.
Кэнсиэри саамай кыра кыттааччыта «Чуораанчык» уһуйаанын иитиллээччитэ Долун Иванов, ырыаһыттар Эрхан Слепцов, «Иэйии» вокальнай ансамбль, «Сайылык далбардара» уонна «Дойдууна» үҥкүү бөлөҕө ылбаҕай ырыаларынан, нарын үҥкүүлэринэн киэргэттилэр.
Василий Черкашин, норуот айымньытын киинин уус-уран салайааччыта