И.С. Портнягин аатынан Сыырдаах орто оскуолатыгар алын сүһүөҕү түмүктүүр отчуоттуур кэнсиэрбит дьон-сэргэ иннигэр бэрт сэргэхтик, киһи дууһалыын сынньанар, астынар гына ааста.
Бу кэнсиэргэ үөрэнээччилэр, төрөппүттэр, бары, биир дьиэ кэргэн курдук ылыстыбыт. Ылбаҕай ырыалар, араас үҥкүүлэр, авангард муода, көрүдьүөс сыанка нүөмэрдэри көрдөрдүбүт. Киирии билиэтинэн лотерея оонньонно. Лотерея бириистэрэ сүрүннээн ийэлэр астаабыт минньигэс астара, аҕаларбыт байанайдарыттан бэрсиһиннэрбит бултара, оттон супер бириискэ дьиэҕэ-уокка олус туһалаах пылесос оонньонно. Супер бирииспитин 3-с кылаас үөрэнээччитэ Соня Анастатова ылан үөрүүбүт үксээтэ.
Виктория Викторовна хас биирдии үөрэнээччитигэр таба тайанан, оҕоҕо олус мындырдык сыһыаннаһан, талааны арыйар, сөптөөх суолу ыйар үтүө сүбэһит, чугас доҕор, иккис ийэ кэриэтэ күндү, тапталлаах киһи аатын ылан, оҕолорбут быыкаа сүрэхтэригэр букатынныын иҥэн хаалла. Учууталбыт хас биирдиибитигэр бэйэтэ өйдөбүнньүк оҥоһуктары бэлэхтээн соһутта, уйадытта, астыннарда. Кылаас оҕолорун, төрөппүттэри түмсүүлээх оҥорон, учууталбыт тапталынан биэрбит үөрэҕин оҕолорбут ылынан, сиэрдээхтик иитиллэн, сиэттиспитинэн, саҥа саҕахтары арыйа, үүнэ-сайда салгыы үөрэниэхтэрэ, билиилэрин өссө кэҥэтиэхтэрэ диэн туран тапталлаах учууталбытыгар Виктория Викторовнаҕа, оҕолорбут маҥнайгы учууталларыгар махталбытын биллэрэбит. Ону тэҥэ «Астык» маҕаhыынтан Стручков Валерий Дмитрьевич оҕолору минньигэс аhынан күндүлээтэ. Иванов Павел Павлович кылаас кэлэктиибэр бэйэтин кылаатын киллэрдэ. Кэлбит дьоммутугар, үөрүүбүтүн үллэстибиккитигэр, ытыскыт тыаhын бэлэхтээбиккитигэр махтал!
Алын сүһүөх выпуск төрөппүттэрэ