И.С. Портнягин аатынан Сыырдаах орто оскуолатыгар улууска биллэриллибит Аҕа сылын түмүктүүр «Эр хоһуун буол» тэрээһин ахсынньы 7 күнүгэр ыытылынна. Ол курдук, кэлбит аҕалар уолаттарынаан үс хамаанданан арахсан, тыҥааһыннаах күрэхтэһиигэ алта көрүҥҥэ күөн көрүстүлэр. Спорду сэҥээрээччилэр, спортивнай оонньуулары сөбүлээччилэр күрэһи астына-дуоһуйа көрдүлэр.
Бу оонньуу аҕалары түмэн, оҕону иитиигэ бэйэлэрин көрүүлэрин, санааларын үллэстэн, сатабылларын көрдөрөн, тыа сиригэр сөптөөх идэлэри билиһиннэрэн, кэнчээри ыччакка Ийэ дойдуга тапталы иҥэрэр, чөл олоҕу пропагандалыыр, эти-сиини чэбдигирдэр сыаллаах-соруктаах ыытылынна.
Оонньуу көрүҥнэрэ:
1. ОЗК противогаз кэтии, баһаарынай көстүүмү толору таҥныы, аптамааты ыһыы-хомуйуу.
2. Күрдьэҕинэн чоҕу оһох айаҕар таба быраҕыы.
3. Гаайка эрийиитэ.
4. Тоһоҕо саайан киллэрии.
5. Мас эрбээһинэ.
6. Балыгы хаптарыы.
Күрэс түмүгүнэн үс миэстэ тахсан, бары хамаандалар кыттааччылара мэтээлинэн, добун суругунан, нэһилиэкпит тэрилтэлэрэ олохтообут (Бэрт Ууһун нэһ. дьаһалтата, баһылык Ильин И.П., балыыһа, Бурцева С.В., дьиэ-уот коммунальнай хаһаайыстыба, Черкашин О.Г., кулууп, Бурцева Л.Л., «Мүрү- Уу», Копырин В.И., «Чуораанчык» уһуйаан, Иванова М.С.), «Үктэл»общественнай түмсүү, ИП Стручков В.Д., ИП Попов Д.Е. маҕаһыыннарын минньигэс бириистэринэн наҕараадаланнылар, ону тэҥэ, оонньуу кэннэ бука бары күрэс кыттыылаахтарын, дьүүллүүр сүбэҕэ үлэлээбит дьоммутун оскуолабыт остолобуойугар минньигэс астаах сандалыбытыгар ыҥыран күндүлээтибит.
Тэрээһин үөрүүлээх чааһын оскуола дириэктэрэ Иван Портнягин эҕэрдэ тылынан арыйда, «Дьүкээбил» ансаамбыл үҥкүүнэн , оскуола үлэһитэ, төрөппүт Андрей Васильев ырыанан киэргэттилэр.
Күрэһи ОБЖ, физкультура учууталлара Румянцев С.В., Копырина А.И., сүрүн судьуйанан үлэлээтилэр: нэһилиэкпит спортзалын дириэктэрэ Шепелев В.В., А.П.Иванов аатынан норуот айымньытын киинин уус-уран салайааччыта Черкашин В.П., уонна история учуутала Местникова О.С. иилээн-саҕалаан ыыттылар.
Уопсай түмүккэ «ДЬУЛУУР» хамаанда (хапытаан Анатолий Копырин) бары көрүҥҥэ бэлэмин көрдөрөн 1-кы миэстэни ылары ситистэ, «БАРС» хамаанда (хапытаан Геннадий Бурцев) кыранан хаалан – 2-с миэстэ, «СКОРПИОН» хамаанда (хапытаан Федор Захаров) бочуоттаах 3-с миэстэҕэ тигистэ.
Бары кыттыыны ылбыт төрөппүттэрбитигэр, спонсордарбытыгар, дьүүллүүр сүбэҕэ үлэлэспит дьоммутугар оскуола салалтатын аатыттан барҕа махталбытын тиэрдэбит. Өрүү да бу курдук оҕолоргут тустарыгар кыһамньыгытын ууран, оскуоланы кытары тиһигин быспакка үлэлэһиэххит диэн эрэнэбит.
Ньургуйаана Хорунова, иитэр үлэҕэ дириэктэри солбуйааччы