Соторутааҕыта Бороҕон нэһилиэгэр «Түмсүү» сынньалаҥ киинигэр үгүс көлүөнэ ыччаты билиигэ уһуйбут кэргэннии учууталлар, Бороҕон нэһилиэгин бочуоттаах олохтоохторо, тыыл, педагогическай үлэ бэтэрээннэрэ Александра Ивановна, Александр Семёнович Бурцевтар төрөөбүттэрэ 90 сылларыгар анаан, кинилэр дьоһун олохторун, үлэлэрин, дьарыктарын, сырдык ааттарын үйэтитэн «Сырдыкка, үтүөҕэ уһуйбут дьоһун олох» кинигэни 2024 сылга Россияҕа Дьиэ кэргэн, өрөспүүбүлүкэбитигэр Оҕо саас сылларынан уонна 2023 сылга Россияҕа Учуутал-наставник, өрөспүүбүлүкэбитигэр Үлэ сылларын чэрчитинэн, оҕолоро, кэнчээри ыччаттара ахтыы хомуйан, бу үйэлээх кинигэни таһааран, сүрэхтэниитэ ыытылынна.
Кинигэ сүрэхтэниитигэр нэһилиэкпит олохтоохторо, бэтэрээн учууталлар, В.М. Прокопьев аатынан Тумул орто оскуолатын педколлектива, үөрэнээччилэрэ, биир дойдулаахтарбыт сырыттылар. Саха балаҕаныгар аҕам саастаахтар кэлбит ыалдьыттары үүттээх чэйинэн, арыылаах алаадьынан көрүстүлэр. Ол курдук Дьокуускайтан Булуҥ оройуонун Бороҕон нэһилиэгиттэн төрүттээх үөрэппит үөрэнээччилэрэ – өрөспүүбүлүкэ гериатрическай клиникатын сэбиэдиссэйинэн өр сылларга олус эппиэттээх үлэҕэ таһаарыылаахтык үлэлээбит РФ уонна СӨ үтүөлээх бырааһа, «Гражданскай килбиэн» бэлиэ кавалера, медицинэ бочуоттаах бэтэрээнэ Зоя Прокопьевна, СӨ бочуоттаах тутааччыта, бэтэрээнэ Вячеслав Гороховтар дьиэ кэргэттэрэ, Дьокуускайтан бииргэ алтыһан үлэлээбит РСФСР үөрэҕириитин, СӨ ыччат политикатын туйгуна Елена Аммосова, уруу-аймах дьоно Бороҕонтон Уус Алдан улууһун уонна Мүрү нэһилиэгин бочуоттаах олохтооҕо Матрена Семёновна, Бэрт Ууһун нэһилиэгин бочуоттаах олохтооҕо Николай Васильевич Москвитиннар, Суотту нэһилиэгиттэн бэтэрээн учууталлар Татьяна Семёновна, Иван Иванович Пирожковтар кыыстара СӨ доруобуйаҕа харыстабылын туйгуна, Суотту нэһилиэгин бочуоттаах олохтооҕо Татьяна Ивановна Тарасова – Пирожкова, Суотту нэһилиэгин бочуоттаах олохтоооҕо, Суотту модельнай библиотекатын сэбиэдиссэйэ Раиса Черкашина ытыктабыллаах ыалдьыттарынан буоллулар.
Фойеҕа «Учуутал, эн үрдүк ааккар» диэн Тумул орто оскуолатын, нэһилиэк музейын матырыйааллара уонна кэргэннии учууталлар Александра уонна Александр Бурцевтар тустарынан матырыйааллар, А.Р. Халдеева аатынан модельнай библиотека фондатыттан кинигэ быыстапката, Бурцевтар педагогическай династияларын көрдөрөр быыстапкалыыр стеллаж турда.
Кинигэ презентациятын Бороҕон нэһилиэгин дьаһалтатын баһылыга, Уус Алдан улууһун бочуоттаах олохтооҕо, СӨ ыччат политикатын туйгуна Василий Алексеев этиитинэн саҕаланна. Улуус кииннэммит библиотечнай тиһигин директора Иван Копырин эҕэрдэтин, өйдөбүнньүк кинигэтин Суотту модельнай библиотекатын сэбиэдиссэйэ Раиса Черкашина туттарда.
Истиҥ эҕэрдэлэрин В.М. Прокопьев аатынан Тумул орто оскуолатын директора Константин Копырин, «Түмсүү» СК директора Анастасия Сухонина тиэртилэр. Биир коллективка өр сылларга бииргэ алтыһан үлэлээбит РСФСР үөрэҕириитин туйгуна, учууталлар Учууталлара Зоя Протопопова, күндү ыалдьыттар, бэтэрээн учууталлар, үөлээннээхтэрэ, үөрэнээччилэрэ сылаастык ахтан-санаан аастылар.
Эҕэрдэ ырыалары култуура үлэһиттэрэ Андрей Макаров, Василий Копырин бэлэхтээтилэр.
«Удьуор утум салҕанар» диэн уус-уран быыстапкаҕа талба талааннаах, уран тарбахтаах учуутал, бочуоттаах сынньалаҥҥа тахсан баран ииһинэн утумнаахтык дьарыктаммыт Александра Бурцева уустаан-ураннаан тикпит, дьэрэкээн оҥоһуктарын кэтэн сценаҕа оскуола үөрэнээччилэрэ, аҕам саастаахтар түмсүүлэрэ, оскуола алын сүһүөх кылааһын учууталлара хааман көрдөрдүлэр. Уус-уран быыстапканы туруорда кыыстара Светлана Прудецкая туруорда.
Кинигэ презентациятын аҕам саастаахтар үҥкүүһүттэрин бөлөҕө “Олбохтоох” үҥкүүнэн түмүктээтилэр.»Сырдыкка, үтуөҕэ уһуйбут дьоһун олох» кинигэ сүрэхтэниитин А.Р. Халдеева аатынан Бороҕон олохтоох библиотекатын сэбиэдиссэйэ Светлана Прудецкая, Суотту олохтоох библиотекатын сэбиэдиссэйэ Раиса Черкашина салайдылар. Кэлбит ыалдьыттар, нэһилиэк олохтоохторо тэрээһини үрдүктүк сыаналаатылар.
Сардаана Стрекаловская. В.М. Прокопьев аатынан Тумул орто оскуолатын педагог-библиотекара