2018 сыллаахха саха литературатыгар магистр диссертациятын көмүскээн, ону туоһулуур дипломмун ылан, тута дойдубар Уус Алдаҥҥа айаннаабытым. Ыһыах нөҥүө күнүгэр дьиэбэр сынньана сыттахпына, кэлбиппин, үлэ көрдүүрбүн хантан билбитэ буоллар, оччотооҕу эрэдээктэр Алексей Троев: “Биһиэхэ үлэлии киирбэккин дуо?” – диэн бэрт соһуччу этиини көтөхпүтэ. Бэнидиэнньик күн эрэдээксийэҕэ тиийбитим. Туох үөрэҕи бүтэрбиппин сураспыттара, кэккэ ыйытыылары биэрбиттэрэ. Сорудаҕы ол күн толорон, туттарбытым. Онон эрэдээктэрдиин кэпсэппитим өйүүҥҥү күнүгэр хаһыат үлэһитэ буола охсубуппун бу баар курдук өйдүүбүн.
Эдэр хааным өтөн эбитэ дуу, хаһыат күүһүн туһанарга туруннаҕым дуу, тута үлэ итэҕэһин-быһаҕаһын саралыыр “Сытыы бөрүө” рубрикаҕа суруйар буолбутум. Итиэннэ эдэр киһи буоларым быһыытынан, ыччакка анаан тахсар “Сайдам саас” сыһыарыыга матырыйааллары биэрэрим.
Саҥа үлэһит соһуччу ыҥырыынан сүүрэрим, хомондьуруопкаларга сылдьарым. Үс сыл үлэлиир кэммэр хаһыаппыт бэтэрээн-үлэһитэ, аксакала Иннокентий Ильич Сыроватскай сыаналаах сүбэлэри биэрбитэ, суруналыыс буола үүнэрбэр улахан тирэх буолбута. Улууһум хаһыатыгар үлэлиир кэммэр Информацияны киэҥ эйгэҕэ тиэрдиигэ бастыҥ үлэһит аатын ылбытым.
Хаһыакка үлэлиир кэмнэрим бэлиэ түгэнинэн 2019 сылы ааҕабын. Аммаҕа ыытыллыбыт Саха сирин спортивнай оонньууларыгар суруналыыс быһыытынан командировкаланыым буолар. Нэдиэлэ устата улууһум спортсменнарын сырса сылдьан сырдаппытым. Ити үлэ тулуурга үөрэппитэ. Оонньуулартан кэлээт, Суоттуга илин эҥээр эрэдээксийэлэрин ыһыаҕын тэрийсибитим. Биир идэлээхтэрбит олус астынан, үөрэн-көтөн, дуоһуйа сынньанан барбыттара. Ити сыл бары өттүнэн күүрээннээх, көхтөөх, интэриэһинэй этэ. Итиэннэ, биллэн турар, улууһум нэһилиэктэрэ тугунан тыынан, үлэлээн-хамсаан, кыһалҕаланан олороллорун билсэрбэр бырабыыталыстыба, улуус дьаһалтатын отчуоттарыгар суруналыыс быһыытынан сылдьыым улахан оруоллаах. Отчуот хайдах ааспытын, олохтоохтор тугу туруорсалларын хайдах баарынан хаһыаппар сырдаппытым.
Хаһыат эйгэтигэр эдэр-кырдьаҕас диэн арахсыбакка, бары биир дьиэ кэргэн курдуктар. Бэлиэ күннэри, бырааһынньыктары үөрэ-көтө бэлиэтиирбит. Биир киһи курдук субуотунньуктарга тахсарбыт, улуус тэрээһиннэригэр кыттарбыт. 2020 сыллаахха хаһыаппыттан кынат анньынан, учуонай истиэпэнин көмүскүүр сыалтан аспирантураҕа туттарсыбытым. Онно үөрэнэрбэр хаһыатым салалтата ыстаапка аҥаарыгар үлэлэтэн, улаханнык абыраабыта.
2021 сыллаахха бэйэбэр саҥаны арыйар сыалтан Дьокуускай куоракка “Ил Түмэн” хаһыакка үлэлии киирбитим. Онтон эһиилигэр “Саха” национальнай көрдөрөр-иһитиннэрэр хампаанньа Уус Алданнааҕы салаатыгар эмиэ суруналыыс быһыытынан үлэлии-хамсыы, айа-тута сылдьабын. Талан ылбыт идэбин ис сүрэхпиттэн ылынарбар, бэриниилээхтик сыһыаннаһарбар төһүү буолбут тапталлаах хаһыаппар махтанабын.
Айаал МОЛОКОТИН, «Саха» НКИХ Уус Алданнааҕы филиалын кэрэспэдьиэнэ