От ыйын 10-11 күннэригэр Казахстаҥҥа Алматинскай уобалас Шалкоде сиригэр норуоттар икки ардыларынааҕы “Сокровище Хан-Тенгри” этнофестиваль буолан ааста. Манна Уус Алдан улууһун норуотун маастара Прасковья Бочкарева кыл-сиэл оҥоһуктарынан кытынна.
Бу туһунан Прасковья Владимировна маннык кэпсиир:
– Фестивальга 12 омук дойдутуттан уонна Россия регионнарыттан этнодизайнердар бэйэлэрин коллекцияларын көрдөрдүлэр. Мин фестиваль салайааччыта, “Каdam KZ” бренды төрүттээбит Асель Болотовна Омурбековаттан тус ыҥырыы тутаммын кыттан кэллим. Итинник улахан таһымнаах көрдөрүүгэ “Кыл куруһуба оһуора” кылтан-сиэлтэн оҥорон таһаарбыт сэлээппэлэрбин уонна аксессуардары быыстапкаҕа туруоран фестивальга мустубут кэрэни сэҥээрээччилэр уонна ааттаах-суоллаах дизайнердар биһирэбиллэрин ылбыппыттан сэмэйдик үөрэбин. Париж, Милан подиумнарыгар тахсар дизайнердары кытта тэҥҥэ мин сэмэй оҥоһуктарбын көрдөрөн, кинилэрдиин алтыһан, кэпсэтэн олус элбэҕи билэн, көрөн кэллим.
