Суотту нэһилиэгэр сэрии, тыыл ветераннарыгар анаан оттук маһы бэлэмниир күргүөмнээх, көхтөөх тэрээһин күрэхтэһии быһыытынан өрөспүүбүлүкэҕэ, улууска аан бастаан 2009 сыллаахха өр кэм нэһилиэкпитин салайбыт баһылык Василий Иванов көҕүлээһининэн, тэрийиитинэн тэриллибитэ. Онтон ыла нэһилиэк олохтоохторун үлэҕэ түмэр субуотунньук саас аайы ыытыллан кэллэ.
Бу үтүө үгэс быйыл даҕаны олохтоох дьаһалта, баһылык В.П. Баишев, баһылыгы солбуйааччы Н.Г. Черкашина, социальнай үлэһиттэр Т.И. Тарасова, М.В. Прудецкая тэрээһиннэринэн бүгүн далааһыннаахтык ыытылынна. Субуотунньук параадын спортинструктор Э.К. Николаев салайда. Нэһилиэк баһылыга В.П. Баишев, ветераннар сэбиэттэрин бэрэссэдээтэлэ Е.И. Свинобоева тыл этэн мустубут дьону эҕэрдэлээтилэр, үлэ хаамыытын билиһиннэрдилэр.
Нэһилиэк үлэ тэрилтэлэрэ Суоттутааҕы ДьУоКХ (сал. Черкашин Н.Н.), баһаарынай чаас (сал. Местников Н.Н.), «Доҕордоһуу» музей кэлэктиибэ (директор Охлопков С.С.-Айым), «Лена» уонна «Туйма» ТХПК үлэһиттэрэ (сал. Черкашин М.А., Мухин В.П.), Суотту орто оскуолатын үрдүкү кылаастарын үөрэнээччилэрэ уонна үлэһиттэрэ (директор Петухова И.М.), С.С. Васильев-Борогонскай аатынан сүрүн оскуола (директор Федорова О.В.), Уус Алданнааҕы техникум үлэһиттэрэ уонна устудьуоннара (директор Стрекаловскай А.В.), «Кустук» оҕо саада (сал. Спиридонова М.Н.), «Мичээр», «Түһүлгэ» сынньалаҥ кииннэрэ (сал. Патрасова В.В., Гоголева Е.Н.), олохтоох бибилэтиэкэлэр, нэһилиэк ветераннара, олохтоохторо кытыннылар, «Уйгулаах алаас» маҕаһыын туттар тэрилинэн көмө буолла.
Бэлэмнэммит оттук маһы ититии ситимигэр холбоммотох дьиэлээх СВО кыттыылаахтарын дьиэ кэргэттэригэр, сэрии тулаайаҕа икки киһиэхэ, Афганистан сэриитин ветераныгар, I группалаах инбэлииттэргэ тэлгэһэлэригэр диэри трактордаах дьоммут Заровняев П.Н., Черкашин М.А., Добрецов Г.Г., Черкашин Уо. Н, Белолюбскай А.Е. тиэртилэр. Тиэйээччилэринэн Андросов В.Н., Черкашин Уо.Н., Васильев А.С. үлэлээтилэр. Оттон И.И. Парников быйыл онус сылын миин буһаран субуотунньук кыттыылаахтарын тото -хана итии аһынан хааччыйда.
Субуотунньук кэмигэр култуура үлэһиттэрэ тэрилтэлэр икки ардыларыгар эгэлгэ астаах остуолу тардыыга күрэхтэһиини, көрдөөх оонньуулар ыыттылар, онон таарыйа кыһыны атаарыы тэрээһинэ буолла.
Эгэлгэ астаах остуолу тардыыга «Доҕордоһуу» музей, СС. Васильев-Борогонскай аатынан оскуола, Уус Алданнааҕы техникум баай-талым остуоллары тардан үлэһиттэрин күндүлээтилэр. Көрдөөх оонньууларга С.П. Васильев – тоһоҕону саайыыга, техникум устудьуона Юрий Соколов – скакалкаҕа, В.С. Федорова хаатыҥканы быраҕыыга кыайыылаах буоллулар.
Субуотунньук бэрт көхтөөхтүк, тэрээһиннээхтик ыытылынна. Оттук маһынан көмө ылбыт дьоммут бу олохтоммут үтүө хамсааһыны көҕүлээбит, тэрийбит, кыттыспыт дьоҥҥо бука барыларыгар улахан махталларын тиэрдэллэр.
Раиса Черкашина, библиотекарь