Суотту орто оскуолатыгар үөрэх декадатын чэрчитинэн үтүө үгэскэ кубулуйбут учууталлар хамаандаларын икки ардыларыгар 7-с төгүлүн методическай турнир бэрт сэргэхтик, интэриэһинэйдик ыытыллан түмүктэннэ. Барыта 33 педагог кытынна, ол иһигэр 24 предметник-учуутал уонна 9 педагог.
Учууталлар жеребьевканан алта хамаандаҕа арахсан үс түһүмэххэ күөн көрүстүлэр. Бастакы түһүмэх – “Бэйэни билиһиннэрии”, иккис түһүмэх – “Кылааһы кытта алтыһыы”, биллиилээх дьон этиилэринэн тиэмэни арыйыы, үһүс түһүмэх – мастер-класс “СТиЭМ”, фундаментальнай өйдөбүллэри үөрэтэр предметтэрин өттүттэн арыйан көрдөрүү. Сэрэбиэй түмүгүнэн «высота», «проблема», «хаос», «пустота», «время», «интеллект» курдук фундаментальнай өйдөбүллэри арыйан 15 мүнүүтэ устатыгар кэпсээтилэр-көрдөрдүлэр.
Дьүүллүүр сүбэҕэ үлэлээтилэр: В.М. Бурнашева – ветеран учуутал, өр сылларга дириэктэри научнай-методическай үлэҕэ солбуйааччы, И.И. Черкашина – дириэктэри үөрэх чааһыгар солбуйааччы, И.И. Алексеев – дириэктэри иитэр үлэҕэ солбуйааччы, Е.Е. Филиппов – дириэктэр эбээһинэһин толорооччу уонна оҕолор дьүүллүүр сүбэлэрэ (10-с кылаас үөрэнээччилэрэ).
Үс түһүмэх кэнниттэн уопсай түмүк таҕыста, анал номинациялар бэрилиннилэр.
“Опят и мастерство” – “6 ключей”, “Образование будущего” – “Синергия”, “Мастера креативных решений” – “Камни бесконечности” хамаандаларга. Үһүс бириистээх миэстэҕэ таҕыста “Билим+”, иккис “Призма” хамаанда уонна кыайыылаҕынан ааттанна “Архитекторы будущего”хамаанда.
Хас биирдии учуутал маннык методическай турнирдарга кыттан бэйэтин билиитин хаҥатар, саҥа сүүрээннэри үөрэтэр, эдэр учууталлар уопуттаах коллегаларын кытта алтыһан элбэххэ үөрэнэллэр.
Тэрээһин түмүктүүр добун чааһыгар Суотту орто оскуолатын өр сылларга сатабыллаахтык салайан кэлбит дириэктэрбит Ирина Михайловна Петухова методическай турнирга бэйэтин сыанабылын биэрдэ: “ Быйылгы «Үөрэхтээһин декадатын» иһинэн ыытыллыбыт методическай турнир түмүктүүр тэрээһинэ ураты түгэн буолла. Бэлиэтиэхпин баҕарабын сылтан-сыл оскуолабыт учууталларын профессиональнай тургутуга-метотурнир сайдан, историята кэҥээн, учууталлар интэриэстэрэ үрдээн, аныгы ньымалар туттуллан, сонун көрүүлэр киирэн, саҥа өйдөбүллэр, тиэмэлэр ырытыллан, оҕолор харахтарыгар учуутал атын өттүттэн арыллан иһэрэ саарбаҕа суоҕун уонна метотурнир оскуола олоҕор биир учуутал таһымын үрдэтэр ньыма быһыытынан мөккүөрэ суох киирбитин. Бүгүн эһиги этэр этиилэргит, ыйытар боппуруостаргыт, баҕа санааларгыт барыта инникигэ, сайдыыга туһаайыллар…»
Светлана Бубякина, история учуутала