Улууспут киэн туттар тоҕус Геройун албан ааттарын салҕааччы ыччат дьоммут бүгүн Күлүмнүүр аатынан култуура дыбарыаһыгар муһуннулар.
Ол курдук “Азия оҕолоро” норуоттар икки ардыларынааҕы VIII спортивнай оонньууларын, “Спортивные якутяне” өрөспүүбүлүкэтээҕи спортивнай күрэхтэһиитин итиэннэ Бүтүн Россиятааҕы “Поют дети России” хоровой ырыа куонкуруһугар “Норуот традиционнай культуратын харыстааһын иһин” анал ааты ылары ситиспит “Кэнчээри” образцовай үтүөлээх ансаамбыл кыттыылаахтара (сал. Василий Парников), Бүтүн Россиятааҕы уруһуй күрэһигэр бастакы миэстэлээх Мүрү 2№-дээх орто оскуолатын 5 кылааһын үөрэнээччитэ, “Өркөн” киин иитиллээччитэ Надя Егорова (сал. Евгения Местникова) чиэстэннилэр, анал сертификаттары туттулар.
Улуус баһылыгын солбуйааччы Анатолий Сторожев улуус салалтатын аатыттан үрдүк ситиһиилээх оҕолору эҕэрдэлээн туран, тоҕус Геройдаах улуус кэлэр кэскилэ дэгиттэр сайдыылаах, талааннаах ыччата инникитин да киһи аймах үрдүк ситиһэр чыпчаалын – героизмы көрдөрөр күүстээх, кыахтаах буолалларыгар баҕа санаатын тириэртэ. Итиэннэ үрдүк ситиһиилээхтэргэ наҕараадалары туттарда.
Улуус спорка салаатын начальнига Евгений Алексеев дуулаҕа күүстээх, сымса, сылбырҕа, түргэн, тобуллаҕас толкуйдаах эдэр боксердарга, тустууктарга, сүүрүүктэргэ, мас тардыһааччыларга, саахыматчыттарга, аны үйэ көрүҥэр – кибертспорка ситиһиилээх бастыҥ үөрэнээччилэргэ анал суруктары, тренердэригэр сертификаттары туттарда. Быйыл өрөспүүбүлүкэтээҕи “Спортивные якутяне” күрэхтэһиигэ улуус спортсменнара хамаанданан 4-с миэстэни ылан, инники өттүгэр өссө күүстээх бэлэмнэниини ааһан, бириистээх миэстэҕэ дьулуһуу тыына олохсуйарыгар салайааччы быһыытынан эрэнэрин биллэрдэ. “Азия оҕолоро” норуоттар икки ардыларынааҕы спортивнай оонньууларыгар бокса көрүҥэр кыһыл көмүс мэтээли ылары ситиспит Мүрү 2 №-дээх орто оскуолатын 10-с кылааһын үөрэнээччитэ Айсен Неустроев (тренер Илья Иванов) үрдүк ситиһиитэ үгүс спортсменнарга үтүө холобур буолуоҕа.
Оттон улуус үөрэххэ салаатын начальнига Степан Литвинцев оҕо искусствотын бастыҥнара – бүтүн Россияҕа тиийэ классическай, народнай ырыаны тэҥинэн үрдүк таһымҥа толорор “Кэнчээри” ансаамбыл ыраыһыттара “Азия оҕолоро” оонньуулар гимнэрин уонна Астрахань куоракка бүтүн Россиятааҕы хоровой общество тэрийбит күрэһигэр анал ааты ылары ситиспиттэринэн эҕэрдэлээн туран, эһиил Аҕа дойду Улуу сэриитигэр Кыайыы 80 сылыгар улуус үөрэнээччилэрэ – барыта 1500 оҕо кыттыылаах улахан хор патриотическай ырыаны толороругар бэлэмнэнии хас биирдии оскуоланан ыытыллан, модун күүс буолан аан дойдуга эйэлээх олоҕу түстүүр кыайыы 80 сылын дьоһуннук көрсөргө сыал-сорук туруорбутун сэҥээрэ иһиттибит. Итиэннэ олоҥхону, олоҥхонон операны оҕолор эмиэ араас оскуолаларынан, оҕо саадтарынан толороллоро олохтоноругар баҕа санаатын тириэртэ.
Бу курдук улууспутугар ыытыллар Дьоруойдар күннэригэр тоҕус Дьоруойдаах Уус Алдан улууһун инники кэлэр кэскиллэрэ түмсэн, аныгы кэмҥэ героизм суолтатын өйдөөн, араас хайысхаҕа ону ситиһэр сыаллаах тарҕастылар.
Светлана Сивцева