Уус Алданнааҕы сокуоннай саастарын ситэ илик оҕолору чөлүгэр түһэрэр киин Арассыыйаҕа Дьиэ кэргэн, Саха сиригэр Оҕо саас, Уус Алдаҥҥа Аҕа сылларын сибээстээн «Аҕа алгыһынан, Ийэ иэйиитинэн» бырайыак иһинэн «Сүрэхпит сылааһын ийэҕэ» диэн улуустааҕы опека уонна Ис дьыала отделларын кытары кыттыһан тэрийбит тэрээһиммит алтынньы 17 күнүгэр олус истиҥник буолан ааста.
Бырайыак төрөппүттэргэ, оҕолорго анаан саха итэҕэлин, үгэстэрин нөҥүө дьиэ кэргэҥҥэ истиҥ сыһыаны, тапталы үөскэтэргэ уонна үлэҕэ үөрүйэхтэри иҥэрэргэ үлэлэһэр соруктаах. Ол курдук киин иитээччилэрэ туруорбут быыстапкаларын төрөппүттэр, ыҥырыылаах ыалдьыттар сэҥээрэн көрдүлэр. Киин иитээччитэ, «Оҕуруо оһуора» куруһуок салайааччыта Зоя Сивцева оҕолор оҥоһуктарынан быыстапканы олус интэриэһинэйдик кэпсээтэ, көрдөрдө. Салгыы киин директора Иннокентий Сергеев мустубут ийэлэри эҕэрдэлээтэ уонна: Хас биирдии ыал – ийэтинэн», – диэн чорботон эҕэрдэ суруктары, сэмэй бэлэхтэри туттартаата.
Тэрээһини Семен Ефремов сэргэхтик ыытта. Талааннаах эдэр ийэлэр ыалдьыт буолан кэлэн, маастар-кылаастары көрдөрдүлэр. Ол курдук: Пелагея Аргунова дьиэтээҕи усулуобуйаҕа мыыланы оҥоруу кистэлэҥнэрин кэпсээтэ, көрдөрдө. Александра Черкашина «Чэгиэн» түмсүү салайааччыта, айылҕаҕа сыһыан, эмтээх оттор тустарынан кэпсээбитин, хаартыска көрдөрбүтүн ийэлэрбит олус сэҥээрдилэр. Оксана Тарская полиэфир шнурунан макраме, хлопковай быанан суумка арааһын тигэрин, баайарын, дьиэни тупсаҕай гына хайдах киэргэтиэххэ сөбүн кэпсээтэ, быыстапкалаан көрдөрдө. Алдана Троева оҕуруонан, лазернай станогунан, лобзигынан арааһы барытын оҥоруохха сөбүн медиапрезентациянан көрдөрөн кэпсээтэ. Тэрээһиммитин Варвара Сидорова, Мария Федорова ылбаҕай ырыаларынан өссө тупсардылар.
Онон төрөппүттэрбит күннээҕи түбүктэн сынньанан, элбэҕи билэн- көрөн олуһун астыннылар, барҕа махталларын, биһирэбиллэрин эттилэр.
Юлия Бурцева, социальнай педагог