Бүгүн сырдатар киһим Өнөр нэһилиэгиттэн төрүттээх кондитер, үгүс сурутааччылаах блогер, сатабыллаах хаһаайка, «Саха аһа аныгылыы» төрүт астан ураты сонун ырысыаптардаах кинигэ ааптара, үс уол оҕо сырдыгынан сыдьаайа сылдьар күн күбэй ийэтэ, улахан дьиэ кэргэн мааны далбар хотуна Марианна Бурцева буолар.
Марианна Николаевна ХИФУ Саха филологиятын уонна култууратын факультетыгар саха-английскай салаатын ситиһиилээхтик бүтэрэн, үөрэхтээһин эйгэтигэр таһаарыылаахтык үлэлээбитэ 10-тан тахса сыл буолла. Кини Эһэлээх бөһүөлэгэр Светлана, Николай Протопоповтар дьиэ кэргэттэригэр төрдүс оҕонон 1989 сыллаахха алтынньы 24 күнүгэр күн сирин көрбүтэ. Сүрдээх сытыы-хотуу кырачаан кыыс ийэтэ Светлана Ивановна ас минньигэһин астыырын умсугуйан көрөрө. Оскуолаҕа үөрэнэ сылдьан ийэтин кытта ас астаһарын олус сөбүлүүрэ, онон киниэхэ “улааттахпына ас арааһын астыам” диэн баҕа санаата оҕо эрдэҕиттэ иҥмитэ.
2007 сыллаахха Мүрү 2-с №-дээх орто оскуолатын ситиһиилээхтик бүтэрээт Дьокуускай куоракка Саха, омук тылын учууталын идэтигэр туттарсан киирэр. Устудьуоннуу сылдьан кэргэн тахсан, икки уол оҕоломмуттара эрээри олохторо табыллыбатаҕа, олоҕор көрсүбүт тургутууну төрөппүттэрин өйөбүлүнэн этэҥҥэ аһарбыта. 2012 сыллаахха үөрэҕин бүтэрэн бастаан «Технологический техникум сервиса» преподавателинэн үлэлээн саҕалаабыта. Онтон Дойдутугар Уус Алдаҥҥа көһөн Чараҥ оскуолатыгар үлэлии сылдьан, арааһа дьылҕалара таайдаҕа, Мүрү 2-с №-дээх оскуолатыгар тэҥҥэ үөрэммит уолун Семён Бурцевы көрсөн, холбоһон, ньир-бааччы олороллор. Кыра уолун оҕолонон сынньалаҥҥа барыар диэри учууталынан үлэлээбитэ.
Марианна Николаевна эдэркээн ыал ийэтэ түбүктээх үлэ кэнниттэн илиитин сылааһын иҥэрэн сибиэһэй, минньигэс ас эгэлгэтин астаан дьиэ кэргэнин күндүлүүрэ, ордук бурдук аһы астаатаҕына иэйиитэ киирэн сынньанара, дуоһуйара. Оччолорго кыралаан куйаар ситиминэн күннээҕи буһарбыт аһын хайдах астаабытын үллэстэрэ, дьон-сэргэ сэргээн ырысыап көрдүүр буолбуттара. Онтон сиэттэрэн быһа эпииргэ көрөөччүлэрин кытта тэҥҥэ ас астыыр буолбута, ситимҥэ билсэр дьоно ас астыырын сэргээннэр, көрдөһөн: “Хайа, хаһан кинигэ таһаараҕын?” – диэн ыйытар буолбуттара. Оттон Марианна бэйэтэ таптыыр идэтинэн хайдах дьарыктаммытын туһунан бу курдук билиһиннэрдэ:
— Торт оҥорор диэн олус уустук үлэ, туспа талааннаах эрэ дьон ылсар буоллаҕа. Бэйэм хаһан эмит торт астыам эрэ диэн санаабат этим. Онтон арай биирдэ дьүөгэм ийэтин төрөөбүт күнүгэр “торта астаа” диэн көрдөстө. Сакааска хаһан да торт оҥорботох киһи кыратык саарыы түһэн баран астыырга сананным. Ити 2018 сыллаахха ахсынньыга этэ. Олус бэккэ табыллыбыта бары сөбүлээбиттэрэ, махтаммыттара. Арааскыта онтон саҕыллан, кыралаан хобби курдук торт астаан барбытым. Билиҥҥи курдук аҥаардас тордунан дьарыктанан онтон хамнастаныам диэн толкуй кэлбэтэҕэ. Ол кэнниттэн 2019 сылга балаҕан ыйыгар кыра уолбар декретка барбытым, дьиэҕэ олорон тугунан эмит дьарыктаныахпын баҕарарым. 2020 сыллаахха араас кондитер курстарыгар үөрэнэн бэйэбэр эрэл киирэн, дьэ сакааска торт астыыр буолбутум. Онтон ыла, кондитер эйгэтигэр ылларан үлэлээбитим номнуо балачча кэм буолла, ол да буоллар торт астыырым миэхэ син биир хобби курдук.
Марианна Бурцева күннээҕи аһылыкка тугу астаабытын тэттик роликтарга тиһэн үгүстүк уһулбута. 2017 сыллаахха дьүөгэтинээн Марианна Дмитриевалыын «Саха» НКИХ «Үчүгэйиэн бу сиргэ» биэриигэ ыҥырыллан уһуллубуттара ураты интэриэһинэй этэ. Онтон 2020 сылга «Тиэргэн» биэриигэ оҕуруоччут быһыытынан, 2023 сыллаахха «Асчыттар» биэриигэ ыҥырыллан уһуллан үөрбүтэ-көппүтэ. «Ыал ийэтинэн» диэн өбүгэлэрбит мээнэҕэ эппэтэхтэрэ. Марианна бэртээхэй хаһаайка, сайын оҕуруот аһын үүннэрэрин, күһүнүн оҕуруот аһыттан заготовка оҥорорун сүрдээҕин сөбүлүүр. Биллэн турар, аҕалара Семен, оҕолор бары күүс-көмө буолаллар. Сайын аайы эбэлэригэр сайылаан, айылҕаҕа сылдьан дойдуларын салгынын иҥэринэн, дуоһуйа сынньанан, сир астаан, араас барыанньа оҥорон Бурцевтар кыһыҥҥы хаһаастара дьиэлэрин иһигэр дэлэй буолар. Бу курдук дьоһун эдэр ыал оҕолорун үлэҕэ үөрэтэн-такайан, үөрүүлэрин тэҥҥэ үллэстэн олоҕу кытта тэҥҥэ хардыылыы олорортон дьоллоохтор.
Варвара Парникова – Үүйэ, уопс.кэрэсп., Өнөр нэһилиэгэ