Бэс ыйын 26 күнүгэр Саха сиригэр Оҕо иитэ ылбыт дьиэ кэргэттэр ассоциациялара тэриллибитэ 10 сылыгар аналлаах өрөспүүбүлүкэ таһымнаах ыһыах биһиги улууспутугар Чараҥ бөһүөлэгэр, кэрэ көстүүлээх Нэлээн сиригэр-уотугар буолан ааста. Манна барыта аҕыс улуустан оҕо иитэр ыаллар дьиэ кэргэнинэн кэлэн кытыннылар. Кинилэр истэриттэн ыһыах тэрээһинин туһунан ыалдьыттарбыт санааларын иһиттибит.
Надежда Яковлева, Хаҥалас улууһа:
– Бүгүҥҥү тэрээһин олус үрдүк таһымҥа ыытылынна. Биһиги оҕолорбут тустарыгар олорор ийэлэр үөрүөхпүт иһин, оҕолорго анаан олус үчүгэй күрэстэр буоллулар. Остуол хотойорунан минньигэс аһынан күндүлээтилэр, ырыа-тойук маанытын анаатылар. Кулантай аатынан мусуойу сэргии көрдүбүт. Уус Алдан дьонугар-сэргэтигэр ыалдьыттары наһаа истиҥник көрсүбүттэригэр махтанан туран, чэгиэн-чэбдик доруобуйаны, дьоллоох-эйэлээх олоҕу баҕарабын.
Люция Решетникова, Чурапчы улууһа:
– Биһиги уон оҕолоох ыал ыһыахха кэлэн кыттыыны ыла сылдьабыт. Алта иитэр оҕолоохпут. Оҕону иитэр ыаллар ассоциациябыт быйыл төрдүс ыһыаҕа тэрилиннэ. Сылтан сыл тупсан, таһыма үрдээн иһэр. Уус Алдан улууһа олус түмсүүлээҕин көрдөрдө. Ыһыах сиэрэ-туома, икки сиринэн күрэстэр олус тэрээһиннээхтик, тэтимнээхтик ыытылыннылар, бириэмэни билбэккэ да хааллыбыт. Төрөппүттэр санаабытын атастаһан, оҕолорбут билсэн-көрсөн наһаа үчүгэй ыһыах тэрилиннэ.
Мария Ханчаева, Эдьигээн улууһа:
– Биэс оҕобун илдьэ сылдьабын. Бу, Нэлээн диэн наһаа кыраһыабай айылҕалаах сиргэ үктэнэн, олус тэрээһиннээх ыһыахха кыттан наһаа үөрдүбүт. Ыһыах сиэрэ-туома, кэнсиэрэ, күрэстэрэ барыта наһаа тэтимнээхтик, интэриэһинэйдик ааста. Тэрийээччилэргэ улахан махталбын тиэрдэбин.
Дария Никитина, Чурапчы улууһа:
– Мин Чурапчыга попечительство отделын сүрүннүүр исписэлииһэ буолабын. Уус Алданнааҕы Опека отдела наһаа үчүгэй ыһыаҕы тэрийбит. Улуус дьаһалтата, салалтата, тэрилтэлэрэ көхтөөхтүк өйөөбүттэрэ, көмөлөспүттэрэ көстөр. Кыттааччы ахсаана элбэҕэ үөртэ. Оҕолор араас тэрээһиннэргэ, күрэстэргэ наһаа көхтөөхтүк кытта сылдьаллар. Мин ыһыахха саамай оһуохайы сөбүлээтим. Оҕолору кытта сиэттиһэ сылдьан наһаа үчүгэйдик оһуохайдаатыбыт. Бу күн чахчы ыһыах тыына билиннэ, олус үөрдүбүт, тэрийээччилэргэ махталбыт улахан.
Александра Азарова, Нам улууһа:
– Биһиги ыал биир төрөппүт, 11 иитэр оҕолоохпут. Бу ыһыахха биэс оҕобун илдьэ кэлбитим. Уус Алданнар ыалдьыттары көрсүүттэн саҕалаан тэрээһини кыайа-хото туттулар. Түһүлгэҕэ түһээт, сүргэбит көтөҕүллэн, ыһыах алгыһын ылан, санаалыын сырдаатыбыт. Биир күн устата барыта толкуйдаммыт программанан биир да мүнүүтэ чуҥкуйан ылбакка ыһыахтаатыбыт. Онон тэрээһиҥҥэ кыттыспыт хас биирдии киһиэхэ махталбын тиэрдэбин.
Мария Аргунова