Ыам ыйын 12 күнэ – Медсиэстэрэ аан дойдутааҕы күнэ. Уус Алдаҥҥа 2022-2025 сс. В.А. Вонгродскай аатынан Дьокуускайдааҕы медицина коледжын филиала арыллан фельдшер уонна сиэстэрэ идэтигэр үөрэппитэ. Ол иһигэр 16 киһи сиэстэрэ идэтин баһылаан, номнуо улууспут балыыһаларынан тарҕанан үлэлии-хамсыы сылдьаллар. Кинилэртэн саҥа идэлэрин төһө сөбүлээбиттэрин туоһуластыбыт.
Устьяна АРГУНОВА, хирургия отделениетын реанимацияҕа уонна интенсивнай терапияҕа палататын анестезист сиэстэрэтэ:
– Мин урукку өттүгэр улуустааҕы кииннэммит балыыһа оҕо отделениетыгар санитарканан тоҕус сыл үлэлээбитим. Медицина үлэһитэ буолуу эдэр сааспыттан сүрэхпэр иҥмит ыра санаам этэ. Онон филиал арыллыбытыгар тута дьаныһан үөрэммитим. Хайа да киһиэхэ ыалдьыбыт кэмэ саамай уустук, уйан буолар. Ол түгэҥҥэ кини туругун арыый да чэпчэтэр, ыарыытын умуннарар, үмүрүтэр, күүс-көмө буолар дьол мин олоҕум суола буолуон баҕарбытым. Үлэм умсугутар өрүтүн эттэххэ, киһи олоҕун уратыта – хас биирдии киһи бэйэтэ туспа эйгэлээх, историялаах. Кинилэри кытта кэпсэтэн, олохторун туһунан истэн, киһи киһини өйдүүргэ үөрэнэр. Куруутун сайдыы баар: медицина куруук сайдар, саҥа ньымалар, саҥа эмтэр, саҥа тиэхиньикэлэр тахсаллар. Мин хирургия реанимацияҕа салаатыгар үлэлиир буоламмын, реанимация саҥа ситиһиилэрин үөрэтэр, олоххо киллэрэр олус интэриэһинэй. Куруук үөрэнэҕин, сайдаҕын. Быһаарыыны ылыныы: сороҕор суһаллык быһаарыыны ылынарга тиийэҕин. Ол олус ыарахан да, киһини эрчийэр да түгэн буолар. Ити кэмҥэ бииргэ үлэлиир дьоҥҥор итэҕэйии, бииргэ үлэлээһин олус улахан суолталаах. Дьону кытта ситим: быраастары, атын сиэстэрэлэри кытта биир хамаандаҕа киирэн үлэлиигин. Биир сыаллаах-соруктаах дьон бииргэ түмсэн, киһи олоҕун туһугар охсуһаллара дьикти уонна интэриэһинэй. Өссө биир сүрүнэ – киһи олоҕун суолтатын, кини чэбдигин, доруобуйатын хас биирдии түгэнин сыаналыыр, кэрэхсиир буолбутум. Сиэстэрэ идэтэ киһиэхэ эппиэтинэһи, ыраас дууһаны, истиҥ сыһыаны үөскэтэр. Бу бэйэбэр да киһи быһыытынан сайдарбар улахан көмөлөөх. Сиэстэрэ идэтэ хайдаҕый? Бу идэ олус эппиэтинэстээх, ыарахан да буолуон сөп. Күн ахсын дьон олоҕун, доруобуйатын кытта үлэлиигин. Сороҕор түүннэри-күннэри утуйбакка, аһыыры, бэйэҕин умнан туран киһи тыынын быыһыырга кыттыһаҕын. Хас биирдии хамсааһыҥҥар, хас биирдии тылгар сэрэхтээх буолуохтааххын, тоҕо диэтэххэ, эн илиигэр киһи олоҕо, доруобуйата сытар. Бу идэҕэ истиҥ сыһыан, холку майгы, дьоҥҥо аһыныгас буолуу саамай наадалаах. Идэбин олус сөбүлүүбүн. Бу миэхэ көннөрү үлэ буолбатах, анал диэххэ сөп. Хас биирдии үлэҕэ тахсар күммэр дьоҥҥо үтүөнү оҥорорбун санаатахпына, үлэбэр курдаттыы таттарабын. Ыарыһах үтүөрэн, махтаммыттыы мичээрдээн ыларын көрөртөн атын дьол, наҕараада суох.
Майя РОЖИНА, киин балыыһа кардиолог сиэстэрэтэ:
– Бу иннинэ «Кунчээнэ» оҕо саадыгар иитээччи көмөлөһөөччүтүнэн үлэлээбитим. Уруккуттан медицина өттүгэр үлэлиэхпин сөп диэн баҕа санаалаах этим. Бэйэм ветеринар үрдүк үөрэхтээхпин да, ол идэбинэн үлэлээбэтэҕим. Сиэстэрэ идэтин сөбүлээтим. Бу чахчы мин идэм эбит диэн санааҕа кэллим, тоҕо диэтэр, дьоҥҥо көмөлөһөрбүттэн астынабын.
Мария БУРЦЕВА, инфекционнай балыыһа сиэстэрэтэ:
– Мүрүтээҕи «Сардаана» оҕо уһуйааныгар инструктор-гигиениһынан үлэлээбитим уонна билигин да эбии үлэлиибин. Сиэстэрэ буолан дьоҥҥо үтүөнү оҥороору, син биир киһи баарын тухары медик үлэһиттэр наадалар дии саныыбын. Сиэстэрэ үлэтэ хайа баҕарар үлэҕэ курдук ыарахаттардаах, онуоха бииргэ үлэлиир кэллиэгэлэрим күүс-көмө буола сылдьалларыгар махталым улахан. Олус интэриэһинэй идэ, араас дьону кытта алтыһан, билсэн-көрсөн, кинилэргэ күүс көмө, арыт, бэйэҥ туспа психолог буолаҕын. Дьон махтала туохтааҕар да күндү.
Александра ЛЫТКИНА, хирургия отделениетыгар бэрэбээскилиир сиэстэрэ:
– Урут элбэх үлэҕэ үлэлээбитим, кэлин инфекционнай балыыһаҕа санитаркалаабытым. Ыалдьар саҕа куһаҕан суох буоллаҕа. Онон киһи саамай уйан-хатан кэмигэр күүс-көмө буолар аналлаах медицина үлэһитэ буолар баҕа санаа миэхэ уруккуттан баара. Сиэстэрэ үлэтэ улахан эппиэтинэстээх, уустуктаах, умсугутуулаах. Эн илиигэр киһи доруобуйата сүктэриллэр. Дьоҥҥо көмөлөн, мин илиибиттэн киһи чэпчээн, үөрэн таҕыстаҕына – ол буолар сиэстэрэ дьоло. Идэбин олус сөбүлээтим.
Олеся БУРЦЕВА, оҕо поликлиникатын физиотерапия-массаастыыр кэбиниэтин үлэһитэ, оҕо балыыһатыгар реабилитация сиэстэрэтэ:
– Урукку өттүгэр, анал идэтэ суох буолан, оскуолаҕа муоста сууйар этим. Идэ ылаары филиалга үөрэнэргэ санаммытым. Уонна үөрэммиппэр бэйэбэр махтанабын, бу филиалы тэрийбит, олус кыһаллан үөрэппит дьоммор махталым муҥура суох. Сиэстэрэ идэм таһынан тэрилтэм массаастыырга үөрэттэрэн биир тоҕоостоох, дьоҥҥо олус наадалаах идэни баһылаабыппыттан үөрэбин. Дьиҥэр, дьылҕабынан анаммыт идэм быһыылаах, дьон илииҥ сымнаҕас диэн хайгыыллар, махтаналлар. Ол өссө ордук кыһамньылаах үлэҕэ кынаттыыр. Кыһалҕалаах дьон олоҕун чэпчэтэр, кинилэргэ көмөлөһөртөн ордук бу дойдуга суох эбит. Үлэ сылаалаах, уустуктардаах, ол эрээри ыарыһах эн кыһамньыгынан сэргэхсийдэҕинэ, махтаннаҕына, онтон ордук дьол суох.
А
Айталина САДОВНИКОВА, хирургия отделениетын реанимацияҕа уонна интенсивнэй терапияҕа палататын сиэстэрэтэ:
– Сыырдаахха 2016 сылтан “Чуораанчык” оҕо саадыгар гигиена инструкторынан үлэлиибин. Дьоҥҥо көмөлөһөр туһуттан сиэстэрэ идэтин баһылыырга санаммытым. Сиэстэрэ үлэтэ олус интэриэһинэй, наадалаах идэ. Уустуктар бааллар бөҕө буоллаҕа, онно аттыгар кэллиэгэлэриҥ ыйан-кэрдэн сүбэ-ама биэрэллэр, дьон сатыырын эн эмиэ сатыахтааххын. Киһи туохха барытыгар үөрэниэн сөп.
Мария АРГУНОВА