Солко күөххэ үктэнэр кэммит тиийэн кэллэ. Сотору кэминэн тэлгэһэ аайы кэрэчээн сибэккилэр, оҕуруот аһа чэлгийэ үүнүөҕэ. Ол эрээри үүнээйини рассаадалаан үүннэрии киһи эрэ сатыыр, ылсар, бириэмэ булан бүөбэйдэһэр дьыалата буолбатах буоллаҕа. Үөрүөх иһин, аттыбытыгар рассаада үүннэрэн атыылыыр дьон сылтан сыл элбээн иһэллэр. Кинилэр баар буоланнар, хас биирдии ыал тэлгэһэтэ сириэдийэ тыллар. Онон рассааданы атыылаан барыстаныахха сөп дуо диэн интэриэһиргээтибит:
Варвара Гоголева, Мүрү нэһилиэгин олохтооҕо:
– Ахсынньыттан эустома олордон саҕалыыбын, оттон тохсунньуттан лобелияны, сорох петуниялары олордон барабын. Бастаан таблеткаларга, онтон хотуобай буору оргутан баран, өр сыппыт ноһуому эбэн, онно үүнээйилэрбин олордобун. Быйыл минньигэс биэрэс 5 көрүҥүн, помидор 8, оҕурсу 4, кабачок 5, арбуз 2, дыня 2 арааһын, ону тэҥэ санберри, тыква, физалис олоттум. Таһырдьа теплицабытын муус устартар оттон сылытан үүнээйилэрбин онно таһаарабын. Онон үүнэйилэргэ күнү солбуйар лампа холбонор буолан, уот уонна оттук мас сыаната ыараан, рассаадаларбыт эмиэ сыаналара сыл аайы эбиллэр. Дьон ордук ампельнай петуниялары ылаллар, онон оҕуруоччуттар элбэҕи олордон атыылыыр буоллахтарына, барыһырыахтарын сөп.
Тамара Макеева, Чараҥ бөһүөлэгин олохтооҕо:
– Мин бэйэм хобби курдук дьарыктанабын. Урут ийэм үүннэрэр этэ, онтон саҕаламмыта буолуо. Билигин да сыыһам-халтым элбэх, сылтан сыл үөрэнэбин, үөрэтэбин. Быйыл сайыҥҥы сибэккилэри, оҕурсу, помидор, кабачок, дьэдьэн, подсолнух, арбуз үүннэрдим. Олунньу ыйтан саҕалаан дьиэ иһигэр ыһан, муус устартан оттуллар теплицаҕа үүннэрэбин. Теплицабын 3-4ч буола-буола түүннэри-күнүстэри оттобун. Үүнээйини көрүү үгүс сыраны, бириэмэни эрэйэр. Сиэмэ сыаната наһаа ыараата, үгүс сиэмэ хаачыстыбата мөлтөх буолан, наһаа барыстаах дии санаабаппын. Ол да буоллар, син кыратык харчы киллэринээри үлэлиибин. Бэйэбэр уонна куруук ылар дьонум үлэһиилэринэн, дьон туохха наадыйарын үүннэрэ сатыыбын.
Любовь Илларионова, Дүпсүн нэһилиэгин олохтооҕо:
– Идэбинэн иитээччибин, самозанятость быһыытынан кэрэчээн сибэккилэри олордон кыра дохуот киллэринэбин. Сыл аайы гибрид петуниялары олордобун. Кыратык оҕурсу уонна помидор рассаадатын олордобун, быйыл эбии дьиэҕэ үүнэр элбэх сыллааҕы сибэккилэри эбэн атыылаатым. Элбэх үүнээйи киһиттэн элбэх болҕомтону көрдүүр, үчүгэй усулуобуйа баар буолуон наада. Мин дьиэбэр, гаражка олордобун, салгына арыый сииктээх буолуон наада, анал фитолампалары туһанабын. Үүнээйини көрүү-истии ирдэбилэ элбэх, ити эппитим курдук усулуобуйа наада, ону тэҥэ кэмигэр көрүү-истии, сөпкө көрөн аһатыы. Хас ыйынан ситиэхтээҕин ааҕан-суоттаан олордуу буолар. Силис таттаран элбэтии үлэтэ – бэйэтэ туспа үлэ. Мээнэ ыллыҥ даҕаны үүнүө диэбэккин, кини силис тардыар диэри элбэх процесс барар. Дьон ордук гибрид петунияны сөбүлээн атыылаһар, тоҕо диэтэргин, кини биир укка сибэккитэ өлгөм буолар. Онон бу сибэккини олордор ордук дии саныыбын. Рассааданы олордон атыылыыр сезонунан барыстаах дии саныыбын.
Мария АРГУНОВА, Екатерина ЗАХАРОВА