Атырдьах ыйын 8 күнүгэр Амма улууһун ыччата Мүрү нэһилиэгэр Амма өрүһү харыстыыр бырайыактарын чэрчитинэн «Семейный красочный эко-забег AMGARUN» диэн бэрт сэргэх тэрээһини тэрийдилэр. Манна барыта 42 дьиэ кэргэн кытынна. Кыттааччылар дьиэ кэргэнинэн тутуспутунан, “Майаҕатта Бэрт Хара” стадион тула үс төгүл сүүрдүлэр. Бу тэрээһиҥҥэ кэлбит төрөппүттэртэн, кинилэр оҕолорун спортка хайдах сыһыаралларын туһунан туоһуластыбыт:
Арчылаана Захарова, Мүрү нэһилиэгин олохтооҕо:
– Кыыһым иккис кылааһы бүтэрдэ. Кыра эрдэҕиттэн спортка сыһыара сатыыбын. Саҥа спорт дыбарыаһа тутуллуоҕуттан бириэмэ көһүннэр эрэ сүүрэбит, дьарыктанабыт. Кыыһым үҥкүүгэ сылдьар. Иккиэн бииргэ маннык күрэхтэһиилэргэ сылдьарбытын, кыттарбытын сөбүлүүбүт. Иккиэн бэлисэпиэт тэбэ тахсабыт, тыаҕа элбэхтик хаамабыт, сир астыыбыт.
Елена Носова, Майаҕас бөһүөлэгин олохтооҕо:
– Биэс оҕолоохпун, биир сиэннээхпин. Чөл олоҕу тутуһан, спордунан дьарыктанан бэйэ холобурун көрдөрөн, оҕолорбун эмиэ спортка сыһыара сатыыбын. Бэйэм Майаҕастан бэлисэпиэтинэн сылдьан, “Бэрт Хара” стадионугар фитнескэ сылдьабын, сүүрэбин. Оҕолорум эмиэ наар бэлисэпиэтинэн сылдьаллар. Мас тардыһыытынан дьарыктаммытым. Уолум эмиэ мас тардыһыыга холоммута.
Валентина Самсонова, Мүрү нэһилиэгин олохтооҕо:
– Биэс оҕолоохпун. Оҕо син биир төрөппүтүн көрөн үөрэнэр. Онон бэйэ холобурунан эрэ спортка сыһыарыахха сөп. Дьиэбэр бэйэбэр анаан эрчиллэбин, сүүрэбин. Түөлбэ спартакиадатыгар кыттааччыбын. Быйыл сайын өрөспүүбүлүкэҕэ бастыыр иһин күрэскэ сүүрэн холонон көрбүтүм, 400 м сэттис миэстэ буолбутум. Уолум сүүрүүгэ бастакы разрядтаах. Үс уолум үһүөн сүүрүү секциятыгар сылдьыбыттара. Кыыһым эмиэ сүүрүүгэ сылдьан баран, үҥкүүгэ көстө. Биир уолум саахыматтыыр. Төһө кыалларынан актыыбынай сынньалаҥҥа сылдьабыт.
Дмитрий ГОТОВЦЕВ, Мындааба бөһүөлэгин олохтооҕо:
– Бэйэм физкультура учуутала үөрэхтээхпин. Икки уоллаахпын, биир оҕо саада саастаах кыыстаахпын. Уолаттарым иккиэн Мындааба спорт оскуолатыгар үөрэнэллэр, үһүс кылаастан тустууга сылдьаллар. Бу билигин улааппыттарын кэннэ сарсыарда аайы сүүрдэбин. Оҕо кыра сааһыттан наһаа сүрэҕин астарыа суохтаах. Ол иһин дьэ, болҕомтобун ууран эрэбин. Билигин, бэйэм да доруобуйабын көрүнэр кэмим кэллэ диэн сүүрэн эрэбин, онно уолаттарбын илдьэ сылдьабын. Мындаабаҕа олорор буоламмыт, Куоһаҕас күөлүн эргийэн кэлэбит. Уолаттар да улаатан иһэр буоланнар, спорт дьарыктарын сэҥээрэр буолан эрэллэр. Мин санаабар, оҕону 4-5 кылаастан спортка угуйан саҕалыыр ордук. Оттон оҕолор ортолоругар кэтээн көрдөххө, спорду быраҕыы сүрүннээн 8-9 кылааска бэлиэтэнэр. Ону тулуйдахтарына спортка хаалаллар.
Мария Аргунова