Билигин оскуолаларга үөрэх дьылын түмүктүүр быһаарыылаах күннэр тураллар. Ону сэргэ оскуолаларын бүтэрээччилэргэ долгутуулаах түгэн үүнүөҕэ. Оскуоланы бүтэрбиттэрин туһунан ситии-хотуу аттестатын туппут күннэриттэн эдэр саас, устудьуоннуур эриэккэс кэмнэргэ бастакы атылларын оҥоруохтара. Дьэ, онно кинилэр ханнык идэни талыахтарай? Бүгүн оскуоланы бүтэрээччилэртэн бу туһунан туоһуластыбыт.
Тимур Шепелев, Мүрү 1№-дээх орто оскуолатын бүтэрээчи:
– Хайаан да туттарыллар математикаттан уонна нуучча тылыттан ураты литератураны таллым. ХИФУ суруналыыстыка салаатыгар туттарсар баҕалаахпын. Ол иһин литератураны таллым. Онтон тоҕо суруналыыстыкаҕа туттарсар санаабын этэр буоллахха, ийэм Ольга Шепелева суруналыыс этэ. Кини суолун батыһарга сананным уонна онно талаһабын диэххэ сөп.
Күннэй Васильева, Курбуһах орто оскуолатын бүтэрээччи:
– Мин икки сүрүн эрэ эксээмэни туттарабын. Тоҕо диэтэргин, култуура коллеһыгар дьоҕуру көрдөрүүнү онно бэйэтигэр тиийэн туттарабын. Мин кыра эрдэхпиттэн бэйэбин сыанаҕа көрөбүн. Дьону-сэргэни сэргэхситэрбин сөбүлүүбүн. Ол иһин кыра сааспыттан ырыанан, үҥкүүнэн, хомуһунан дьарыктаммытым. Култуура коллеһыгар туттарсыы саамай улахан ыра санаам. Ону толорор туһуттан эксээмэннэрбэр күүскэ бэлэмнэнэ сылдьабын.
Василий Курилкин, Курбуһах орто оскуолатын бүтэрээччи:
– Мин сүрүн эксээмэннэри таһынан химияны уонна биологияны туттарсаары бэлэмнэнэбин. Медик, чуолаан тиис бырааһа буолар баҕалаахпын. Онон ити предметтэри таллым. Докумуоннарбын ХИФУ-га уонна Нерюнгритааҕы филиалга туттарыам.
Июлия Захарова, Лөгөйдөөҕү лицей-интернаты бүтэрээччи:
– Биир кэлим эксээмэммэр нуучча тылын, профильнай математиканы, обществознаниены туттарабын. ХИФУ-гар экэнэмиис, ол эбэтэр менеджер хайысхатын уруккуттан интэриэһиргээн, онно туттарсар сыаллаахпын, баҕа санаалаахпын. Үөрэнэр кэммэр фольклорунан, волейболунан, ырыанан, үҥкүүнэн дьарыктанным. Араас олимпиадаларга, НПК-ларга кыттан ситиһиилэнним.
Владимир Горохов, Мүрүтээҕи уолаттар гимназияларын 11-с кылааһын үөрэнээччитэ:
– Гимназияҕа үөрэнэр кэммэр ордук история, обществознание предметтэрин сэҥээрэн, сөбүлээн үөрэнним. Ол курдук, быраап, обществознание, литература, экономика предметтэрин олимпиадаларын хас да төгүллээх кыайыылааҕынан ааттаммытым. Быйыл бөдөҥ общественнай диэйэтэл В.В. Никифоров-Күлүмнүүр үбүлүөйдээх 160 сылынан СӨ бастакы Президенэ М.Е. Николаев оскуолаларын ситимин олимпиадатын кыайыылааҕын үрдүк аатын сүгэн олус астынным. Билиибин салгыы кэҥэтээри ХИФУ историческай факультетыгар туттарсан, историк, археолог идэтин баһылыахпын баҕарабын.
Афанасий СЕКТЯЕВ, Светлана СИВЦЕВА