Остуол ньуурунуу көнөтүк субуллубат олохпут суолугар киһи дууһатын эмтиир, сылаанньытар, сүргэни көтөҕөр көр-күлүү буоларын билинэбит. Биһиги улууска күлүү жанрыгар үлэлиир элбэх тыйаатыр, бөлөх баар. Олор истэригэр көрдөөх оруолу үгүстүк оонньоон «сүрэҕи эмтиир» аналлаах киһи элбэх. Кинилэр санааларын истиэххэ:
Христина НЕУСТРОЕВА-Огдооччуйа сиэнэ, В.П. Свинобоев аатынан Суоттутааҕы народнай театр артыыската:
– Суоттутааҕы театр иһинэн 1993 сыллаахха Иннокентий Киренскай төрүттээбит «Тэбэнэттэр» көр-күлүү бөлөҕөр 1996 сылтан күн бүгүҥҥэ диэри оонньуу сылдьабын. Ону таһынан айылҕаттан талааннаах, оонньуур сыаҥкаларын бэйэтэ айар, көрү-күлүүнү оройуттан туппут, дьон-норуот тапталын ылбыт, СӨ култууратын туйгуна, хомойуох иһин билигин биһиги кэккэбитигэр суох Туяра Стручкова-Огдооччуйа бөлөҕөр 10 сыл бииргэ оонньообутум. Комедияттан А.Е. Кулаковскай айымньытынан «Дьахтар сэттэ мэтириэтигэр» оонньообутум уонна сыаҥкаларга кыыс, дьахтар, эмээхсин оруолларын толоробун. Миэхэ кыра оҕо оруола табыллар. Көр-күлүү жанра сүрдээх уустук. Ылбычча көрөөччүнү күллэрбэккин. Үгүс көрөөччүгэ оҕо оруолунан – Огдооччуйа сиэнинэн биллэбин.
Аграфена АЛЕКСЕЕВА, «Бээди бэтиэхэлэрэ»көр-күлүү бөлөҕүн артыыската:
– Бээдитээҕи «Куруку» култуура-спорт киинин иһинэн түмсүү 2005 сыллаахха тэриллибитэ уонна «Бээди бэтиэхэлэрэ» диэн ааттанан, 21-с сылын үлэлиир самодеятельнай коллектив буолар. Мин араас оруолу барытын толоробун, кыра оҕоттон саҕалаан эмээхсиҥҥэ, оҕонньорго тиийэ. Сыаҥкаларбыт ааптара республикаҕа биллибит Туяра Стручкова-Огдооччуйа этэ. Бөлөхпүт бастакы салайааччыта Лена Жиркова. Мин билигин бөлөх салайааччытынан сылдьабын. Киһини күллэрии саамай ыарахан жанр буолар. Күлүү – сүрэх эмчитэ диэн мээнэҕэ эппэттэр. Сылаалаах үлэ кэнниттэн күлэн-үөрэн киһи дууһалыын сынньанар, эмтэнэр, олоҕо уһуур. Ханнык баҕарар оруолу табан оонньоотоххо дьону күллэриэххэ сөп. Бэйэм коллективпын уонна көр-күлүү курдук уустук жанрга үлэлии сылдьар, тэҥҥэ дьээбэрэҥ күрэхтэригэр күөн-көрсүһэр бары доҕотторбун көр-күлүү күнүнэн эҕэрдэлиибин!
Татьяна ГАБЫШЕВА, Тумуллааҕы «Түмсүү» норуот айымньытын киинин иһинэн үлэлиир «Айыллан» норуот тыйаатырын «Бэтэкэй бэтиэхэлэрэ» көр-күлүү мини-студия артыыската:
– И.Гоголев-Кындыл «Наара суох» комедиятыгар Суон Суоппуйа, Н.В. Гоголь «Кэргэн кэпсэтии» комедиятыгар Агафья Тихоновна курдук оруоллары толорооччубун уонна сыаҥкаларга оонньооччубун. Көрдөөх оруолу толоруу саамай ыарахан жанр дии саныыбын, оруолгун арыйан, дьону күллэриэххэ наада. Дьону күллэрэргэ дьон итэҕэһин көрдөрөр оруоллар, холобур, акаарытыҥы, дөйүҥү, куттас дьон уобараһа барсар. Сахалар бэйэбитайылҕаттан тоҥуй, эмоция өттүнэн уратылаах буоламмыт буолуо, киһиникүллэрэр ордук уустук дии саныыбын. Ол да буоллар, оруолгун аһары баран үлүннэрбэккэ табан оонньоотоххо, саала иһэ күлэн оргуйа олорор түгэнэ баарбуолар. Ол артыыска – дьол!
Мария АРГУНОВА