Быйыл сааспыт эрдэлээн кэлэн, уһун тымныы кыһын кэнниттэн бары даҕаны сааскы халлаан курдук сымнаан, сырдаан сэргэхсийэ түстүбүт. Сааһы кытары хаһаайкалар үүнээйилэрэ эмиэ силигилии тыллан эрэллэр. Дьиэ үүнээйилэрэ кыһыҥҥы ууларыттан уһуктан, күннээх түннүккэ туран сэргэхсийдилэр, сорохтор сибэккилээн эрэллэр. Онон хаһаайкалартан ханнык үүнээйилэри сөбүлээн олордоллорун, тугунан аһатан, хайдах көрөн-харайан кэрэ сибэккилэри үүннэрэллэрин туһунан ыйыталастыбыт.
Олеся Черкашина, Мындааба бөһүөлэгин олохтооҕо:
– Билигин биллэр блогердары, социальнай да ситимнэргэ көрдөххө, ордук хаппырыыһа суох күөх маасса сибэккилэри олордоллор. Уопсайынан дьиэ иһигэр, сайын тэлгэһэҕэ үүнээйини олус үүннэрэр, анаан үлүһүйэн олордор буоллулар. Мин дьиэ сибэккилэрин, сайыҥҥы сибэккилэри ийэм олордор буолан, оҕо эрдэхпиттэн киниэхэ көмөлөһөн улааппытым диэхпин сөп. Билигин дьиэбэр замиокулькас, фикус 5 арааһа, аспарагус, традесканция, стрелиция Николая, юкка, спатифиллум, сансевиерия, эпипремнум үүнэ тураллар. Сылы эргиччи ыйга биирдэ-иккитэ “Аминосил” анал аһылыгынан уонна “Органик микс” удобрениеларынан аһатабын. Саамай сөбүлүүр сибэкким фикус лирата, эбии аһаабыт буолан, сэбирдэҕэ улаатта уонна доруобай, бэл кылабачыйан көстөр ньалҕаархай көрүҥнэннэ. Сорох сибэккилэрбин кырыйан хойуннарабын, элбэтэбин. Дьиэбит итии, салгына кураанах буолан, кэмиттэн-кэмигэр барыларын сылаас уунан душтубун. Маннык сэбирдэҕин быылын эмиэ ыраастыыгын. Сылы эргиччи турар күөх үүнээйи, дьиэ сибэккилэрэ ханнык баҕарар интерьеры тупсараллар, киэргэтэллэр.
Евдокия Стрекаловская, Хоноҕор бөһүөлэгин олохтооҕо:
– Дьиэҕэ үүнэр сибэккилэри уруккуттан сөбүлээн олордобун. Саҥаттан-саҥа үүнээйилэри боруобалаан олордорбун сөбүлүүбүн уонна миэхэ үүнэр, уруккуттан илдьэ сылдьар эмиэ үүнээйилэрдээхпин. Билигин лимоннай мас, эмтээх алоэ, кислица (“доброе утро”), фиалкалар, герань, традесканция, замиокулькас уонна кактус бааллар. Олус бүөбэйдээбэппин эрээри кэмиттэн кэмигэр бэйэм көрөн уоҕурдууларынан аһатабын. Өссө банан хаҕын ууга сытыаран настойка оҥорон баран, олус хойуу буолбат гына уу эбэн куттахха үүнээйилэрим тупса түһээччилэр. Сорох сибэккилэргэ түргэнник улааталларыгар кыратык саахардаах ууну эбэтэр аспирин таблеткатын ууга суурайан кутабын. Үүнээйи ыарытыйбыт сэбирдэҕэ саһарбыт буоллаҕына, силиһин көрүөххэ наада эбэтэр буорун уларытаҕын. Дьиэ сибэккилэрин үчүгэйдик көрөр уонна сөбүлүүр буоллаххына, төһө баҕарар үүнэллэр. Ол быыһыгар эйиэхэ олох үүммэт сибэкки диэн эмиэ баар буолуон сөп, оннугу мин өр гыммакка атынынан солбуйабын.
Надежда Прокопьева, Бороҕон сэлиэнньэтин олохтооҕо:
– Кыһыннары, сайыннары үүнээйини олордорбун, буорга үлэлиирбин, үүнээйини кытта бодьуустаһарбын сөбүлүүбүн. Дьиэбэр түннүкпэр анал долбуур оҥотторон, үүнээйилэрбин кыһын лампа анныгар туруорабын. Маны тэҥэ луковицалаах үүнээйилэрбин: гладиолус, сортовой георгины, лилияныуонна клубниканы сөрүүн, хараҥа сиргэ ууран кыстатабын. Сибэккилэрбэр туруктара тупсарыгар кыратык стимулятордары кутуохпун сөп, олус үлүһүйэн уоҕурдууну туттубаппын. Миэхэ женское счастье, фикус 7 арааһа, юкка, долларовай мас, араас кактус, эпипремнум, папоротник, кислица 5 арааһа, традесканция 7 арааһа үүнэллэр. Кислицаларбын кыһын суулаан баран эмиэ сөрүүн сиргэ ууран утутабын. Саас буоллар эрэ үүнээйилэрбин кырыйан формировкалыыбын. Бу сотору эмиэ кырыйталыам. Оччоҕуна кыраһыабай көрүҥнэнэллэр, хойдоллор, тупсаллар уонна отростоктарын силис тартаран элбэтэбин. Сибэккини үүннэрэн киһи сынньанар, дьиэҥ салгына да ырааһырар, эркиннэрэ киэркэйэллэр, онтон сүргэҥ көтөҕүллэр, санааҥ чэпчиир.
Екатерина Захарова
Хаартыска ИИ көмөтүнэн оҥоһулунна