Сайыҥҥы биир күн – дьылы аһатар диэн мээнэҕэ эппэттэр, Сахабыт сирин кылгас сайыныгар хаһаайыстыбалаах ыаллар күөх илгэ быйаҥтан төһө кыалларынан сомсон ылар аакка сылдьаллар. Быйыл оҕуруот аһын үүнүүтэ хайдаҕын, ким тугу олордубутун уонна кыстыкка тугу оҥостон хаһааналларын сурастыбыт.
Прасковья ГОРОХОВА, Чараҥ бөһүөлэгин олохтооҕо:
– Быйыл арассаадабын үксүн дьонтон атыыластым. Мин үгүс дьиэ кэргэн тугу олордорун үүннэрэбин. Быйыл доруобуйаҕа туһалаах диэн тыкваны маҥнайгытын үүннэрдим. Урукку дьылларга бу кэмнэргэ арбузпун сиир буолар этим, билигин саҥа сибэккилээтэ эрэ. Кабачок эмиэ бытаарда. Саамай тарҕаммыт көрүҥ – кабачоктан икра, оҕуруот аһыттан рагу, дьиэтээҕи аджика. Кабачоктарбын быһан баран тэрээһэҕэ сөрүүн сиргэ ууран, кыһыҥҥы тымныылар түһэллэринэн тоҥорон кэбиһэбин. Кыһын, оннооҕор саас киллэрэн бөһүйүөр диэри ириэрэбин, хаҕын ыраастыыбын, сиэмэтиттэн араарабын уонна тута икра оҥорон кэбиһэбин. Помидордары эмиэ тоҥоробун – кыһын аджика оҥоруохпун сөп эбэтэр блендергэ эриттэрэн утах оҥостон иһэбит.
Лукерья ИВАНОВА, Уус Күөлэ бөһүөлэк олохтооҕо:
– Сылын аайы оҕуруоппутугар оҕурсу, помидор, кабачок, моркуоп, биэрэс олордооччубут. Быйыл тиэргэммин 200-чэкэ араас сибэккинэн киэргэттим – петуниялар, бархатцылар, львинэй зевтэр, подсолнухтар, космеялар, флокстар, лобелиялар, алиссум. Бу саҥа арбуз олордорго холонон эрэбит уонна быйыл бастакытын клубника олортубут – хата тута үүнүү биэрбититтэн сөҕөн сылдьабыт. Клубниканы хаһаанарга тиийэ иликпит, сиппити үргээммит оҕолорбутунаан тута сиэн кэбиһэбит. Хаһаанарга кабачоктартан икра, «Тещин язык» оҥорооччубун. Билигин биһиги саамай сөбүлүүр аспыт – кыра туустаах оҕурсу салаата.
Светлана Аржакова, Мүрү нэһилиэгин олохтооҕо:
– Бороҕон сэлиэнньэтин аллеятын сибэккилэрин бүөбэйдээн үүннэрбитим үһүс сылыгар барда. Быйыл эмиэ космея, рудбекия, георгин, астра, бархатцы, петуния курдук дьэрэкээн сибэккилэри – барыта сүүрбэччэ араас көрүҥ сибэккини икки тыһыынчаттан тахса ахсаанынан үүннэрилиннэ. Билигин сибэккилэрим кэрэ көстүүнү бэлэхтииллэриттэн астыммыт дьон санааларыттан оҕолуу үөрэбин. Космеябын сэргээн аастахтарына, бэйэбин хайҕаппыт курдук сананабын. Бачча элбэх сибэккини арассаадалаан соҕотоҕун олордобун, бэйэҥ тутан-хабан олордоруҥ ордук табылларыгар эрэнэбин. Бу аллея сибэккилэрин төрөппүт уолум анал байыаннай дьайыыга суох буолбут кэриэһигэр анаабытым. Улахан өйөбүл буолбут Мүрү нэһилиэгин баһылыгын солбуйааччы Вероника Сивцеваҕа махталым муҥура суох.
Светлана Аммосова, Байаҕантай нэһилиэгин олохтооҕо:
– Бэс ыйа кураан буолан, уу хаһааныытыгар ыксыы сырыттыбыт. Хата уу ханаала тардыллан, оҕуруоту нүөлсүтэргэ уустуктары көрсүбэтибит. Биһиги ыал быйыл хаһааҥҥытааҕар да эрдэ «Стелла» оҕурсуну сиэтибит. Помидору «Сибирские скороспелые», «Для внучат», «Балконные» диэн суортары олордобун. Бу суортар үүнэ туран кытараллар, тута хомуйан киллэрэн остуолга уурабыт. Биэрэс, баклажан, кабачок курдук үүнээйилэргэ эмиэ табыгастаах дьыл үүннэ. Моркуобу, хортуоппуйу хото олордор буоламмыт, бэйэбит битэмииннээх астарбытынан уһун кыһыны туоруубут. От ыйыгар уот куйаас күннэр тураннар, үүнээйи өлгөмнүк ситтэ-хотто.
Анатолий Кириллин, Светлана Сивцева