Саҥа дьыл хас биирдиибитигэр бэйэбитин өйдүүр буолуохпутуттан саамай күүтүүлээх-кэтэһиилээх, сүргэни көтөҕөр, үгүс түбүктээх, сүпсүлгэннээх бырааһынньыкпыт буолар. Оттон бу күн икки бүк бырааһынньыктыыр төрөөбүт күннээхтэр эмиэ бааллар эбээт. Бу бырааһынньык күнүгэр оҕолонор уонна күн сирин көрөр диэн эмиэ дьикти уратылаах буоллаҕа. Бүгүн, аптаах-алыптаах күн, оҕоломмут ийэлэртэн уонна төрөөбүт күннээхтэртэн санааларын истиэххэ.
Надежда Самсонова, Майаҕас нэһилиэгин олохтооҕо:
– Мин иккис оҕобун – уолбун 2005 сыл тохсунньу 1 күнэ үүнэр түүнүгэр 3 чааска күн сирин көрдөрбүтүм. Үрүҥ халааттаах аанньалларым «Бөтүүк сылыгар бастакы уол оҕо төрөөтө» диэбиттэрэ, ол иһин уолбутун Петя диэн сүрэхтээбиппит. Петя оскуолаҕа үөрэнэ сылдьан Саҥа дьыл кэннэ тута төрөөбүтүм куһаҕан диир этэ, «Табаарыстарбын төрөөбүт күммэр ыҥырбаппын уонна ас тобоҕунан бырааһынньыктыыбын» диирэ. Оттон миэхэ үчүгэй бөҕө, экономия да уонна ол саҕана харчы да баар буолар, онон үчүгэй бэлэҕи оҥоро сатааччыбыт.
Олеся Винокурова, АГИКИ устудьуона, Курбуһах оскуолатын 2022 с. выпускницата:
– Ахсынньы 31 күнүгэр төрөөбүт күннээхтэр үгүстэрэ Саҥа дьыл бырааһынньыгын сүпсүлгэнигэр кинилэри умна сыһалларын кэпсээччилэр. Оттон миэхэ кэрэ-бэлиэ түгэн. Төрөппүттэрим өрүү бастаан миигин төрөөбүт күммүнэн эҕэрдэлииллэр. Ол кэнниттэн Саҥа дьылынан эҕэрдэлэһии буолааччы. Онон биһиги дьиэбитигэр икки бырааһынньык тэҥҥэ тутуллар.
Ийэм миигин Дьокуускайга оҕоломмут. Туох да ураты мүччүргэннээх түгэн тахсыбатах. Арай акушеркалар саҥа дьыллааҕы открытка бэлэхтээбиттэр.
Алексей Пестряков, ХИФУ устудьуона:
– Мин төрөөбүт күнүм бэйэтэ ураты дии саныыбын. Ол курдук ХХ үйэ бүтэһик күнүгэр – 2000 сыл ахсынньы 31 күнүгэр төрөөбүтүм. Бу күн төһө да Саҥа дьылы көрсүү сүпсүлгэнигэр сөп түбэстэр, төрөөбүт күнүм син биир умнуллааччыта суох. Сарсыарда төрөппүттэрим, бииргэ төрөөбүттэрим эҕэрдэлииллэр. Хата икки бырааһынньыгы тэҥинэн бэлиэтиир туспа үөрүүлээх буолар. Түүн 12 чаас буолуон иннинэ миигин эҕэрдэлииллэр, онтон дьэ саҥа сылы көрсөр буоллахпыт. Онон бырааһынньык сүпсүлгэнигэр мин төрөөбүт күнүм үтүрүллэр диэн санаа суох.
Тимур Бурнашев, Мүрүтээҕи уолаттар гимназияларын 8-с кылааһын үөрэнээччитэ:
– Мин 2009 сыллаахха ахсынньы 31 күнүгэр күнүс 1:30 чааска Бороҕоҥҥо күн сирин көрбүтүм.Ийэм кэпсииринэн 31-кэ Саҥа дьылы көрсө төрүүр дьиэттэн көҥүллэтэн тахсаары сылдьыбыт эбит, ол эрээри эбиэт диэкинэн ыалдьан, күнүс оҕоломмут. Түүн 12 чааска Бороҕон салютун төрүүр дьиэ түннүгүнэн иккиэн көрбүт үһүбүт. Саҥа дьыл төрөөбүт күннээх буоламмын, толору астаах бырааһынньыктааҕы остуол куруутун баар буолар. Ийэм Саҥа дьылга төрөөбүт күннээҕи тортпун оҥорор уонна саамай үчүгэйэ икки бүк элбэх бэлэҕи тутабын. Ол эрээри, бу күн «куһаҕана» диэн доҕотторбун төрөөбүт күммэр кыайан ыҥырбаппын. Саҥа дьыл дьиэ кэргэн бырааһынньыга буолан, сатаан кэлбэттэр.
Мария АРГУНОВА, Афанасий СЕКТЯЕВ