Быйыл Аҕа дойду Улуу сэриитигэр Кыайыы 81 сылын бэлиэтиибит. Билигин биһиги кэккэбитигэр Саха сирин үрдүнэн баара-суоҕа сэттэ сэрии кыттыылааҕа, сэрии дуораанын ааспыт ытык кырдьаҕастарбыт бааллар. Оттон бүгүн Анал байыаннай дьайыы кыттыылаахтара киэҥ Арассыыйа көмүскэлэ буолан, эйэлээх олох туһугар туруулаһаллар. Кинилэр ортолоругар Украина сиригэр-уотугар кыа хааннарын тохпут биир дойдулаахтарбыт эмиэ бааллар. Хорсун дьоммут сырдык ааттарын үйэтитиигэ туох үлэ ыытыллыан сөбүн туһунан туоһуластыбыт.
Светлана АРЖАКОВА, Мүрү нэһилиэгин олохтооҕо:
– Билигин буола турар уустук быһыыга-майгыга сыһыаммытын сааһыланан, санаабытын түһэрбэккэ, Кыайыы өрөгөйө син биир биһиги өттүбүтүгэр буоларыгар саарбахтаабакка, уолаттарбытыгар, кэргэттэрбитигэр суон дурда, халыҥ хахха буола сылдьалларыгар махтанан, өйдүү, өйүү сылдьыахпыт дии саныыбын. Кыайыы кэллэҕинэ, биһиги дьоммут сырдык ааттара дуорааннаахтык ааттаныа, оттон төрөөбүт дойдуларыгар эргиллибэтэхтэр сырдык өйдөбүллэрэ сүрэхпит тэбэрин тухары өрүү тыыннаах буолуоҕа. Өйдөбүлбүт өлбөөдүйүө суоҕа диэн бигэ эрэллээхпин. Улууспут киинигэр кинилэри кэриэстээн сүгүрүйэн, ахтан-санаан ааһар курдук хаартыскалардаах истиэндэни оҥорорбут буоллар, махталлаах дьыала буолуо этэ. Өйдөбүнньүк миэстэ таһыгар сынньанан ааһарга ыскамыайкалаах, араас сибэккилэринэн хараҕы сымнатар, дууһаны сылаанньытар, киһи кута-сүрэ тохтуур күрүөлээх-хаһаалаах буолуон баҕарабын.
Евдокия БАИШЕВА, АБДь-га охтубут буойуттар дьиэ кэргэттэрин түмсүүтүн салайааччыта, Мүрү нэһилиэгин олохтооҕо:
– Эйэлээх олох эргийэрин туһугар эдэркээн уолаттар, хорсун буойуттар сырдык олохторун толук уурбуттара үйэ-саас тухары үйэтитиллэрэ тыыннаахтар ытык иэспит буоллаҕа. Биһиги уолаттарбыт Анал байыаннай дьайыыга сылдьан, Украина Павловка сэлиэнньэтигэр 2022 сыллаахха улууспут кэскиллээх ыччата Василий Данилов, Гаврил Попов, уолум Владимир Баишев дьоруойдуу охтубуттара. Онон 2022 сылтан саҕалаан кинилэри үйэтитиигэ ылсыбыппыт. Кинилэр ааттарын анал кинигэҕэ киллэттэрдибит. Өрөспүүбүлүкэтээҕи кинигэ 2-с, 3-с томнара бэчээккэ бэлэмнэнэ сылдьар. Бастакы ахтыыга улууспутуттан 25 ахтыы, кэлиҥҥигэ 30-тан тахса бэлэмнэнэ сылдьар. Бороҕоҥҥо ытык сирбит «Батыйа» аттыгар Анал байыаннай дьайыы, Афганистан, Чечня, Сирия локальнай сэриилэрин кыттыылаахтарыгар мемориальнай пааматынньык тутуута былааннанар. Мүрү нэһилиэгин дьаһалтата уулуссаларга баннер туруоруутун саҥардыыга, кинилэр сырдык ааттарынан уулуссалар ааттаналларыгар үлэлэһэ сылдьар. Уолаттарбыт ааттарынан өрөспүүбүлүкэтээҕи, улуустааҕы күрэхтэһиилэр 2023 сылтан тэриллэн ыытылыннылар. Улууспут баһылыга Василий Алексеев барыбытын түмэргэ бастакыттан ылсан, бигэ тирэх буоларыгар махтанабыт. Быйыл Анал байыаннай дьайыыга сылдьар уолаттар, төннүбэтэх буойуттар оҕолоругар Саҥа дьылга бэлэх уунан уолаттарбыт кырачааннары үөртүлэр, кинилэргэ махтанан туран этэҥҥэ эргиллэллэригэр баҕарабыт.