Ытыктабыллаах биир идэлээхтэрим, күндү бэтэрээннэрбит уонна ааҕааччыларбыт!
Бу бырааһынньык 2020 сыллаахха дьоһун аналлаах – биһиги элбэх омуктаах өрөспүүбүлүкэбит норуоттарын тылларын уонна култуураҕа нэһилиэстибэлэрин харыстыыр уонна хаҥатар соруктаах төрүттэммитэ. Чопчу бу күн, 1907 сыллаахха, биһиги бэчээт идэлээхтэр убайбыт Василий Васильевич Никифоров – Күлүмнүүр көҕүлээһининэн саха национальнай суруналыыстыката атаҕар туруутугар төрүөт буолбут “Саха дойдута” (“Якутский край”) икки тыллаах хаһыат бастакы нүөмэрэ күн сирин көрбүтэ.
Бүгүн, үйэ ордуга кэм ааспытын кэннэ, биһиги бэчээт тылын бастыҥ үгэстэрин аныгы сыыппара кыаҕын кытта бииргэ алтыһыннаран, бу дьоһун дьыаланы салҕыыбыт.
Бу сыл биһиэхэ ураты суолталаах. Биһиги судургута суох уларыйыы түһүмэҕин нөҥүө ааһан иһэбит. Бу кризис биһиэхэ тургутуу, көһүү-сааһыланыы, дириҥник ырыҥалааһын уонна саҥа кыахтары арыйар кэминэн буолар. Национальнай бэчээт улахан историяҕа киирбит суолугар үгүс кризистэр бааллара уонна билигин да бу бүтэһик буолбатах. Быйыл “Сахабэчээт” бөдөҥсүйдэ, кыаҕын, саҥа кэлэктииптэрин өссө кэҥэттэ уонна өрөспүүбүлүкэ сүрүн бэчээттээн таһаарар кыһатын дьиэтин быһыытынан бэйэтин аатын-суолун бигэргэттэ. Биһиги уопсай үлэбит-хамнаспыт наадалааҕын бигэргэтэр, оттон ааҕааччылар эрэллэрэ – биһиги тутаах баайбыт.
Бүгүҥҥү бырааһынньык күн национальнай бэчээт төрүттэниитигэр үлэлээбит уонна бүгүҥҥү үлэбитин тэрийэрбитигэр бигэ тирэх буолбут күндү бэтэрээннэрбитигэр истиҥник махтанабын.
Ураты истиҥ тыллары аныыбын – биһиги эрэллээх ааҕааччыларбытыгар уонна сурутааччыларбытыгар. Эһиги интэриэскит, биһиэхэ эрэмньигит уонна кытаанах өйөбүлгүт көмөтүнэн билиҥҥи дьиҥнээх тыл-өс тыыннаах, оттон хаһыат наадалаах уонна аныгы тыыннаах буолла.
Күндү биир идэлээхтэрим! Эһиги идэҕитин дэгиттэр баһылаабыккыт, үлэҕитигэр бэриниилээххит уонна төрөөбүт тылгытыгар истиҥ тапталгыт барыбыт үлэтин дьиҥнээхтик суолталаах оҥорор. Эһиэхэ айымньылаах үлэни, саҥа кыайыылары, чэгиэн доруобуйаны, эйэни, үтүө санааны уонна нус-хас олоҕу эһиэхэ уонна чугас дьоҥҥутугар баҕарабын!
Бырааһынньыгынан, Национальнай бэчээт күнүнэн!
«САХАБЭЧЭЭТ” салайааччыта Ньургуйаана Стручкова