Саха Өрөспүүбүлүкэтин боксаҕа сүүмэрдэммит хамаандатын кылаабынай тренерэ, норуоттар икки ардыларынааҕы кылаастаах спорт маастара Дмитрий Федоров этэринэн, атырдьах ыйын 15-22 күннэригэр Екатеринбурга ыытыллар Россия боксаҕа чемпионатыгар дойдубут 62 эрэгийиэниттэн 300 спортсмен күөн көрсүөхтэрэ.
Быйылгы күрэхтэһии Сэбиэскэй Сойуус маршала Георгий Жуков сырдык аатыгар уонна Улуу Кыайыы 80 сылыгар ананар. Саха сирин сүүмэрдэммит хамаандатыгар 9 боксер уонна икки боксер резервэҕэ киирсиэхтэрэ. Уолаттар Дьокуускайга үөрэтэр-эрчийэр бэлэмнэнии бастакы түһүмэҕин ааһан, билигин Новосибирскайга түмүктүүр бэлэмнэниигэ айаннаатылар.
Екатеринбург куорат рингэтигэр Россия бастыҥ боксердара бары кыттыахтара, ол курдук Олимпиада призердара, Аан дойду, Европа чемпионнара уонна призердара күөн көрсүөхтэрэ. Биһиги уолаттарбыт эрчиллии иккис түһүмэҕэр Новосибирскай куоракка атырдьах ыйын 13 күнүгэр диэри ыйааһыннарын тэҥнээһиҥҥэ, пааранан киирсиигэ эрчиллиэхтэрэ, киирсэр тактикаларын чочуйуохтара.
Саха Өрөспүүбүлүкэтин сүүмэрдэммит хамаандатыгар: 48 кг. — Павел Васильев, Михаил Прокопьев, Эрчим Пестряков. 51 кг. — Иннокентий Слепцов. 57 кг. — Ниджат Казымов, 60 кг. — Николай Пшенников, 63.5 кг. — Леон Никифоров, 75 кг. — Данил Прокудин, 80 кг. — Назар Андреев киирсиэхтэрэ.
Резервэҕэ 51 кг. — Мухаммадаюб Исмаилов уонна 60 кг. — Джулустан Иванов кыттыахтара.
Биһиги улуус олохтоохторо биир дойдулаахпытыгар Россия эдэрдэргэ уонна эр дьоҥҥо вице-чемпионугар, РФ боксаҕа спорт маастарыгар Павел ВАСИЛЬЕВКА үрдүк ситиһиини, кыайыыны баҕарабыт. Павел Васильев тренерэ Николай Егоровтыын Челябинскай куоракка бэлэмнэнэр түһүмэххэ от ыйын 31 күнүгэр көттүлэр.
Светлана Сивцева