Быйыл улуус үрдүнэн 3138 гектарга култуурунай үүнээйи ыһыллара былааннанар. Бу былырыыҥҥытааҕар 70 гаанан элбэх.
Биллэрин курдук, улууспутугар ыһыынан дьарыктанар үс хаһаайыстыба баар. Балар туораахтаах култуураны 1466 гааҕа ыһаллар. Бу иһиттэн сэлиэһинэй – 279 гааҕа, эбиэс – 1137,1 гааҕа, кыһыҥҥы оруос 50 гааҕа ыһыллара былааннанар.
Бу туһунан агроном Прокопий Белолюбскай билиһиннэрэр:
– Хаһаайыстыбаларынан араардахха: ”Биэттэ АГРО” ыһыытын иэнэ – 623 гектар. Мантан 125 гаа сэлиэһинэй, 448 гаа эбиэс уонна 50 гаа “Чолбон” диэн кыһыҥҥы оруос ыһыылаах. Дмитрий Илларионов бааһынай хаһаайыстыбата 470 гаа ыһыылаах. Бу иһиттэн 104 гааҕа – сэлиэһинэйи, 366 гааҕа эбиэһи ыһыаҕа. “Саһылыкаан” ТХПК 373 гаа ыһыы иэннээх. Мантан 50 гааҕа – сэлиэһинэйи, 323 гааҕа эбиэһи ыһар былааннаах.
Ыһыы сиэмэтэ 100% бэйэбит үүннэрбит бурдукпутуттан хааччылынна. Маны таһынан аҕыс улууска барыта 325,1 т ыһыы сиэмэтин атыылаатыбыт. Ол курдук Чурапчы, Горнай, Үөһээ Бүлүү, Сунтаар, Томпо, Хаҥалас, Үөһээ Дьааҥы улуустарыгар уонна Дьокуускай к. таһынааҕы хаһаайыстыбаларга бэрилиннэ.
Быйыл хатааһыннаах саас буолан, дьыл кэлиитэ бытаарда. Онон бааһынаҕа киирии эмиэ хойутаата. Билигин сиик саптарыытын үлэтэ бара турар. “Биэттэ АГРО” сиик саптарыытын ыам ыйын 3 күнүттэн саҕалаан, билигин 320 гааҕа тиэртэ. Оттон Дмитрий Илларионов бааһыналара тиэхиньикэ киирэригэр дьэ сөп буоланнар, сиик саптарыытын саҥа саҕалаан эрэр.
Бааһына сиигэ сөп буоларыттан көрөн бастакы туораахтары бу күннэргэ түһэриэхтэрэ.