Бу күннэргэ үөрэх улуустааҕы салалтата Сүрүн судаарыстыбаннай эксээмэн (ОГЭ) түмүктэрин таһаарда, оттон Биир кэлим судаарыстыбаннай эксээмэн бүтэһиктээх түмүктэрин өссө даҕаны кэтэһэбит. Сүрүн судаарыстыбаннай эксээмэни тутарга быйыл улууска 13 пууҥҥа 337 үлэһит үлэлээтэ. Барыта 29 оскуолаттан 357 үөрэнээччи 9-с кылааһы бүтэрэр эксээмэни туттарбытыттан (ол иһигэр доруобуйатынан хааччахтаах 31 оҕо) 344-дэ ситиһиилээхтик туттаран аттестат ылла, 13 оҕо күһүҥҥүлэннэ (о.и. доруобуйатынан хааччахтаах 1 оҕо).
Туйгун аттестаты 14 выпускник тутта (Лөгөйдөөҕү лиссиэй-интернат – 4, Мүрү 1-кы №-дээх ОО – 3, Мүрү 2-с №-дээх ОО, Найахы ОО – 2, Баатаҕай, Суотту, Тулуна ОО – 1).
Тохсус кылааһы бүтэрбити туоһулуур аттестаты ылар туһугар түөрт биридимиэккэ эксээмэни ааһар ирдэнэр: икки булгуччулаах (математика, нуучча тыла) уонна икки талар. Доруобуйатынан хааччахтаах оҕо – нуучча тылын уонна математиканы.
Быйыл улууспутугар информатиканы 180 оҕо талан туттарда (о.и. доруобуйатынан хааччахтаах 1 оҕо), обществознаниены – 106, өрөспүүбүлүкэтээҕи сүрүн эксээмэни (саха тылын) – 100, географияны – 93, биологияны – 74, физиканы – 43 (о.и. доруобуйатынан хааччахтаах 1 оҕо), историяны, химияны – 18, английскай тылын – 13, литератураны – 5.
Бэлиэтиир буоллахха, оскуолаҕа профориентационнай үлэ сөпкө барар буоллаҕына, үөрэнээччилэр 9-с кылааска талбыт эксээмэннэрин 11-с кылааска эмиэ талыахтаахтар. Тохсус кылаас кэнниттэн выпускник салгыы орто оскуолаҕа үөрэниэн сөп эбэтэр орто үөрэххэ аттестатын орто баалынан туттарсыан сөп.
Саргылана Громова, Уус Алданнааҕы үөрэх управлениетын уопсай үөрэхтээһини хааччыйар уонна кэтээн көрөр отделын салайааччыта