Балаҕан ыйын 15 күнүгэр «Майаҕатта Бэрт Хара» стадиоҥҥа Мүрү нэһилиэгэ төрүттэммитэ 65 сылынан уонна Улуу Кыайыы 80 сылынан Мүрү нэһилиэгин дьаһалтатын тэрийиитинэн сүүрүү уонна хаамыы декадатын үөрүүлээх аһыллыыта буолла.
Бу декада 1999 сыллаахха Мындааба спортивнай лицейын көҕүлээһининэн саҕаланан ыытыллыбыта. Кэлин тохтуу сылдьан баран, энтузиаст тренер Зинаида Афанасьева Мүрү нэһилиэгин дьаһалтатыгар туруорсан ыытыллар буолла.
Итиэннэ былырыын өрөспүүбүлүкэҕэ спортивнай хамсааһыны көҕүлээччи, тэрийээччи Николай Тарскай төрөөбүтэ 100 сылынан көхтөөхтүк ыытыллыбыта.
Үөрүүлээх тэрээһиҥҥэ спортсменнары, үөрэнээччилэри, төрөппүттэри Мүрү нэһилиэгин дьаһалтатын баһылыгын солбуйааччы Вероника Сивцева, Бороҕоннооҕу оҕо спорт оскуолатын директора Михаил Слепцов эҕэрдэлээтилэр.
Туйаара Ларионова салайар «Энергия» үҥкүү коллектива аэробика көрдөрөн тэрээһини киэргэттилэр. Ол кэннэ спорт оскуолатын чэпчэки атлетикаҕа тренерэ Мария Слепцова эти-хааны чэбдигирдэр дьарыгы оҥордо. Сүүрүү-хаамыы декадатын кыттыылаахтара бары биир киһи курдук зарядка оҥордулар. Салгыы стадион туонатын сүүрэр суолугар маассабай сүүрүү көрүөхтэн кэрэ көстүүтэ буолла
Светлана Сивцева