Бүгүн «Россия ийэлэрэ» уопсастыбаннай хамсааһын Уус Алданнааҕы салаатын отчуоттуур мунньаҕа буолла. Улууспутугар 2014 сылтан бу хамсааһыны салайан кэлбит Марианна Федотова уонча сыл устата ыыппыт үлэлэрин хардыыларынан билиһиннэрдэ уонна биир санаанан үлэлээн-хамсаан кэлбит дьонугар-сэргэтигэр, улуус уопсастыбаннай түмсүүлэригэр, тэрилтэлэригэр, үлэлээн кэлбит улуус дьаһалтатыгар ис сүрэҕиттэн махтанна.
Тэрээһиҥҥэ «Россия ийэлэрэ» уопсастыбаннай хамсааһын Саха сиринээҕи салаатын салайааччыта Прасковья Борисова кытынна. Прасковья Петровна хамсааһын үлэтин, саҥа бырайыактарын билиһиннэрдэ. Кэлбит дьон Марианна Федосиевнаҕа бу сыллар тухары ыыппыт үлэлэрэ таһаарыылаахтык салаллыбытын санаан-ахтан, ордук кыаммат-түгэммэт дьиэ кэргэҥҥэ көмөлөһөрү улахан болҕомтоҕо ууран кыһамньылаахтык үлэлээбитин бэлиэтээн, долгуйан туран истиҥник махтаммыттара маннык түмсүү чахчы олохпутугар суолталааҕын, Марианна Федосиевна сүҥкэн сыратын ууран туран үлэлээбитин туоһулаата.
Мунньах түмүгэр биэс хандьыдааты талан «Россия ийэлэрэ» уопсастыбаннай хамсааһын улуустааҕы салаатын салайааччытын таларга куоластаатылар. Ол түмүгэр Бороҕоннооҕу ускуустуба оскуолатын уруһуй учуутала Сусанна Аммосова талылынна. Сусанна Семеновна айымньылаахтык үлэлии-хамсыы сылдьар киһи, бу үлэни кыайа тутуоҕа диэн эрэллэрин, баҕа санааларын эттилэр.
Мунньах кэннэ Прасковья Борисова саҥа талыллыбыт састаабы көрсөн, инники үлэни сырдатта, сүбэ-ама биэрдэ.
Мария Аргунова