Бүтүн Россиятааҕы «Родные — любимые» дьиэ кэргэн форумун чэрчитинэн, оҕо уонна ыччат “Бастыҥнар хамсааһыннара” уопсастыбаннай хамсааһын, улуустааҕы дьиэ кэргэн уонна ыччат политикатын управлениетын тэрийиитинэн дьиэ кэргэҥҥэ аналлаах истиҥ көрсүһүү буолла.
Тэрээһиҥҥэ улууспутугар ситиһиилээхтик үөрэнэр оҕолордоох, үлэлии-хамсыы олорор сэттэ ыал ыҥырыллан кэлэн, бэйэ-бэйэни кытта көрсөн, олохторун-дьаһахтарын билистилэр.
Ыалдьыттарынан Мүрү нэһилиэгиттэн спорду олохторун аргыһа оҥостубут түөрт кыыс оҕолоох улуустааҕы спортивнай оскуола чэпчэки атлетикаҕа тренерэ Мария, дириэктэрэ Михаил Слепцовтар буоллулар.
Маны тэҥэ түөрт оҕолоох дьиэ кэргэн, улуус нэһилиэнньэтэ, оҕо-аймах туруктаах олоҕун туһугар уһун кэмҥэ быраабы харыстыыр уоргаҥҥа үлэлээбит Доминика уонна полиция сотруднига Василий Егоровтар, иитэр дьиэ кэргэн, элбэх оҕолоох ийэ Сардаана Босикова, «Кэскил» оҕо саадын музыкальнай салайааччыта, түөрт оҕо ийэтэ Елизавета Черкашина буоллулар.
Суотту нэһилиэгиттэн республикаҕа “Бастыҥ ааҕар дьиэ кэргэн” номинация кыайыылаахтара түөрт оҕолоох Надежда, Семен Федоровтар, эһэлэрэ педагогическай үлэ ветерана, СӨ үөрэҕириитин туйгуна Гавриил Мигалкины кытта ыалдьыттаатылар.
Түүлээх нэһилиэгиттэн түөрт оҕолоох диьэ кэргэн, бу сайын ыытыллыбыт дьиэ кэргэн биригээдэтин көрүү кыайыылаахтара Мария, Владимир Винокуровтар. Ийэ — норуот айымньытын дьиэтин уус-уран салайааччыта, аҕа — ДьУоКХ бэтэрээнэ.
Элэһин бөһүөлэгиттэн үлэни өрө туппут түөрт оҕолоох ыал, бааһынай хаһаайыстыба салайааччыта Руслан, кэргэнэ Варвара Поповтар үгүс кэпсээннээх буоллулар.
Үтүө үлэһит, бастыҥ дьиэ кэргэн быһыытынан улууска биллэр-көстөр дьоммутун Бастыҥнар хамсааһыннара регионнааҕы салаа бэрэссэдээтэлэ Оксана Михайлова видео-сибээс нөҥүө эҕэрдэлээтэ. Эҕэрдэ бастыҥа, бэйэни билиһиннэрии кэнниттэн кэлбит ыаллар ыытааччыны Алекскандр Гоголевы кытта ирэ-хоро кэпсэтиигэ кытыннылар. Ырыа-тойук аргыстаах дьиэ кэргэттэр эҕэрдэ ырыаларын бэлэх ууннулар.
Ольга Шепелева