«Ис сүрэхтэн…» үбүлүөйдээх сааһы бэлиэтиир дьоро күҥҥэ мустубуттар педагогическай үлэ бэтэрээнин Елизавета Федоровна Сивцеваны истиҥник эҕэрдэлээтилэр.
Үөрүүлээх күн тэрээһинэ Офиснай киин иккис этээһин фойетыгар турбут «Эҥин дьикти харандаастар» быыстапканы билиһиннэрииттэн саҕаланна. Елизавета Федоровна – «Умсулҕан» кэллиэксийэньиэрдэр түмсүүлэрин чилиэнэ, СӨ үрүҥ көмүс бэлиэлээх кэллиэксийэньиэрэ. Кини муспут харандаастара көрбүт эрэ киһини кэрэхсэтэллэр, сөхтөрөллөр. Үс ыскаап тухары тиличчи тардыллыбыт быыстапканы билиһиннэриини үөрэх управлениетын отделын салайааччыта Клара Троева өрүү да буоларын курдук хомоҕой тылынан салайан ыытта. Елизавета Федоровна харандаастар историяларын кэпсээнэ дьон болҕомтотун тарта, истибиттэр үгүһү билэн сэргэхсийдилэр, эҥин араас харандаастары көрөн соһуйдулар.
Салгыы бырааһынньыктыы киэргэммит саалаҕа улуус үөрэхтээһинин убаастанар киһитин, пед. үлэ бэтэрээнин, ССРС, РСФСР норуотун үөрэҕириитин туйгунун, СӨ үөрэҕириитин үтүөлээх үлэһитин, бочуоттаах бэтэрээнин, «Саха-Азия оҕолоро» пуонда стипендиатын, Мүрү нэһилиэгин бочуоттаах олохтооҕун Е.Ф. Сивцеваны 80 сааһын туолбутунан эҕэрдэлиир үөрүүлээх чаас ыытылынна. Үөрэх управлениетын оскуола иннинэҕи үөрэхтээһин отделын специалиһа Оксана Черкашина салайыытынан эҕэрдэ тыллар, ырыалар биэчэри ситэрэн биэрдилэр. Үөрэх управлениетын начальнига Федор Татаринов, улуустааҕы профком бэрэссэдээтэлэ Николай Готовцев эҕэрдэ тыллара, куораттан, улуустартан видео эҕэрдэлэр, Елизавета Федоровна кыыһын уонна сиэнин, ону тэҥэ Мындааба «Кэнчээри» уһуйаан иитиллээччилэрин, үөрэх управлениетын кыргыттарын үҥкүүлэрэ, уһуйаан иитээччилэрин Анастасия Кириллова, Акулина Черкашина кэрэ ырыалара биэчэри тупсаран биэрдилэр.
Елизавета Федоровна Сивцева – киэҥ билиилээх специалист, ирдэбиллээх салайааччы, улууска дошкольнай иитиини, оҕо саадтарын материальнай-техническэй баазаларын хаҥаппыт, үлэҕэ үгүс саҥа сүүрээни киллэрбит убаастанар, ытыктанар киһи.
Кини 1946 сыл ыам ыйын 27 күнүгэр күн сирин көрбүтэ. 1965 сыллаахха Мүрү орто оскуолатын үөрэнэн бүтэрбитэ. Ол кэнниттэн икки сыл оҕо саадыгар иитээччинэн үлэлээн баран, Иркутскайдааҕы пединститукка үөрэнэ киирбитэ. 1971 сыллаахха үөрэҕин бүтэрэн төрөөбүт оройуонугар кэлээтин кытта оройуоннааҕы үөрэх салаатыгар үлэҕэ ылбыттара. 25 сыл устата оскуола иннинээҕи үөрэхтээһин отделыгар иниспиэктэринэн, салайааччынан үлэлээбитэ. Үлэлиир сылларыгар 14 саҥа оҕо саада тутуллан үлэҕэ киирбитэ, 6 кыра комплектаах оҕо саадтара аһыллыбыта. ДИП «Сонор» оонньууну оҕо саадтарыгар киллэриини көҕүлээбитэ, тэниппитэ. «Сонор» диэн сахалыы тылынан босуобуйа ааптара.
Сынньалаҥҥа тахсан бараноскуола иннинээҕи үөрэхтээһин тэрилтэлэрин историяларын суруйан, Мүрүтээҕи «Кэскил» оҕо саадыгар музейы тэрийбитэ. 2010 сылга диэри Мүрүтээҕи «Мичил» оҕо саадыгар психологынан, эбии үөрэхтээһин педагогунан айымньылаахтык үлэлээбитэ, үгүс мэтиэдьикэ босуобуйаларын бэчээттэппитэ. Маны таһынан хас да кинигэ ааптара, кыттыгас ааптара буолар. Ахтыылара сурунаалларга бэчээттэммитэ.
Үөрүүлээх күҥҥэ оҕо тэрилтэлэрин бэтэрээннэрин «Хаачылаана» түмсүүтэ (сал.Наталья Говорова), «Умсулҕан» кэллиэксийэньиэрдэр түмсүүлэрэ (сал. Станислав Луковцев) истиҥ тыллардаах эҕэрдэлэрин иһирэх ахтыынан, дириҥ махталынан тиэртилэр. Елизавета Федоровна сүһүөҕүн үрдүгэр сэргэхтик сылдьан баай уопутуттан үллэстэ, сүбэ-ама буола сылдьарыгар баҕа санаанан салайтаран үөрүүлээх тэрээһин түмүктэннэ.
Елена Сыроватская, уопсас. кэрэсп.