Балаҕан ыйын 26–27 күннэригэр Тулуна оскуолата лидердары иитэн таһаарар уйаҕа кубулуйан ылла, манна улуустааҕы «ШКОЛА АКТИВА: ЗАЖИГАЙ СЕРДЦА» тэрээһин ыытыллан ыччаттарбытыгар ураты кэрэ кэми бэлэхтээтэ.
Бу тэрээһини балаҕан ыйын 27 күнүгэр бэлиэтэнэр Саха Өрөспүүбүлүкэтин Судаарыстыбаннаһын күнүгэр, ону тэҥэ дойдубут бэрэсидьиэнэ Владимир Путин биллэрбит норуоттар сомоҕолоһууларын сылыгар анаатыбыт. Тулалыыр эйгэни тупсарарга, уларытарга бэлэмнээх, улуус саамай көхтөөх, инники ыралаах уонна сыаллаах-соруктаах үөрэнээччилэрэ муһуннулар.
Тэрээһин олус сэргэхтик, умнуллубат курдук ааста:
✨ Баһаатайдар кыттааччылары бэйэ-бэйэлэрин кытта бодоруһалларыгар, хамаанда тыынын күүһүрдэллэригэр уонна бэйэ бэйэҕэ эрэнэргэ үөрэттилэр.
✨ «Норуоттар доҕордоһуулара» тэрээһин ыччат болҕомтотун тарта, уйадытта! Хас биирдии этэрээт талан ылбыт норуотун үгэһин, култууратын уонна уратытын олус чаҕылхайдык арыйдылар. Өрөспүүбүлүкэбитигэр олорор элбэх араас омуктарга убаастабыллаахтык сыһыаннаһалларын көрдөрдүлэр уонна биир дойдуга бары иллээхтик-эйэлээхтик олорор буоламмыт олус күүстээхпитин өссө төгүл дакаастаатылар.
✨ Иккис күн «ШКОЛА 2.0» бырайыактыыр үлэҕэ инники кэскилбитигэр анаатыбыт. Оҕолор дьиҥнээх стратег быһыытынан бэйэлэрин холонон көрдүлэр, сонун идеялары, бырайыактары уонна тэрээһиннэри көмүскээтилэр. «ШКОЛА 2.0» чэрчитинэн көмүскэммит бырайыактар кумааҕынан муҥурданыахтара суоҕа, биһиги кинилэри үлэҕэ ылан, сотору кэминэн улуус таһымыгар олоххо киллэрэн барыахпыт.
“Школа актива: зажигай сердца” тэрээһиммит түмүктүүр түһүмэҕинэн биһиги национальнай төгүрүк үҥкүүбүт — оһуохай буолла.
Марина Жиркова, иитэр үлэҕэ дириэктэр сүбэһитэ