Алтынньы төрдүс бэнидиэнньигэр аан дойдуга оскуола библиотекаларын күнэ бэлиэтэнэр. Оскуола библиотекатын туһунан санаатахха, элбэх киһи хараҕар уу-чуумпу уонна кинигэ сыттаах ыраас хос көстө түһэр…
Бүгүн оскуола библиотекара – кинигэ эрэ биэрээччи буолбатах, кини – оҕо ис санаатын истэр, сүбэлиир, сырдыкка уонна кэрэҕэ угуйар эрэллээх доҕор. Бу тыллар бары Суотту орто оскуолатын педагог-библиотекарыгар Зинаида Николаевна Бочкареваҕа сөп түбэһэллэр.
Зинаида Николаевна Суотту орто оскуолатын 1987 сыллаахха бүтэрэн баран оччотооҕу кэм ирдэбилинэн “Лена” совхозка производстваҕа икки сыл үлэлээн баран Кемерово куоракка культура институтун бүтэрэн библиотекарь идэтин баһылаан үөрэммит оскуолатыгар 1994 сылтан үлэтин саҕалаабыта.
Оскуола библиотекара – ураты идэ. Кини күн аайы элбэх оҕону кытта алтыһар, кинилэргэ кинигэ алыптаах эйгэтин арыйар.
Оскуола библиотекарын үлэтэ хас да хайысхалаах: үөрэх кинигэтинэн хааччыйыы, кинигэҕэ тапталы иҥэрии, төрөөбүт тылы, литератураны, историяны сырдатыы, цифровой билиигэ үөрэтии…
Зинаида Николаевна – улуу дойдубут историятыгар, төрөөбүт тылбыт уонна култуурабыт күннэригэр аналлаах оскуола, нэһилиэк иһинэн ыытыллар тэрээһиннэр актыыбынай тэрийээччилэрэ, ыытааччылара. Суотту орто оскуолатыгар сыл аайы бэлиэ түгэннэргэ аналлаах ыытыллар “Историко-сюжетно ролевая игра” тэрээһин саҕалааччылартан биирдэстэрэ буолар. Ол курдук оскуола оҕолоро, үлэһиттэрэ, төрөппүттэрэ кыттыылаах, дьон өйүгэр-санаатыгар хаалбыт “Императорский бал”, “Парад Победы на Красной площади 1945 года”, “Новый год на ВДНХ: история СССР – Дружба народов”, “Театральный фестиваль “Золотая маска”, «Цирк “Шапито” уо.д.а тематическай тэрээһиннэр бэрт үрдүк тэрээһиннээхтик ыытыллыбыттара.
Оскуола библиотекаларын күнүнэн Суотту орто оскуолатын коллектива, төрөппүттэрэ уонна үөрэнээччилэрэ тапталлаах педагог-библиотекардарын Зинаида Николаевнаны ис сүрэхтэриттэн эҕэрдэлииллэр, өссө үрдүк ситиһиилэри, чэгиэн туругу уонна ситиһиилэри баҕарабыт!
Светлана Бубякина, история учуутала