Аҕам саастаахтар уонна Учууталлар күннэригэр сыһыаран Орто Эбэ анал интэринээт оскуолатын 60 сыллаах үбүлүөйүнэн «Сүрэхпит сылааһын оҕолорго» кинигэ сүрэхтэниитэ буолла.
Тэрээһиммитигэр ытыктыыр бэтэрээннэрбит, үөрэх управлениетын начаалынньыгын солбуйааччы М.П. Пухов, үөрэх үлэһиттэрин идэлээх сойуустарын улуустааҕы тэрилтэтин бэрэссэдээтэлэ Н.Н. Готовцев, оскуолабытыгар дириэктэринэн үлэлээбит И.П. Олесова, интэринээт оскуолаҕа өр сылларга дириэктэринэн үлэлээбит Г.И. Тимофеев уонна методист иитээччи Е.М. Тимофеева төрөппүт кыыстара В.Г. Тимофеева, Өлтөх нэһилиэгин баһылыгын солбуйааччы И.С. Местникова, нэһилиэк тэрилтэлэрин салайааччылара уонна Өлөчөй интэринээт оскуолатын үлэһиттэрэ кыттан эҕэрдэ тылларын эттилэр.
Бу саҥа дириҥ ис хоһоонноох кинигэҕэ оскуола тэриллиитин историята, билиҥҥитэ сурулунна, хаартыскаларынан бигэргэннэ. Баай ис хоһоонноох докумуоннар, хаартыскалар, араас сылларга үлэлээн ааспыт, билигин үлэлии сылдьар учууталлар, үлэһиттэр ахтыылара киирдилэр. Барыта 90 экземплярдаах 2 түһүмэхтээх, 216 страницалаах кинигэ буолан таҕыста. Кинигэни интэринээт оскуола дириэктэрэ Н.К. Колодезникова, СӨ үөрэҕириитин туйгуна, СӨ үөрэхтээһини бочуоттаах бэтэрээнэ В.В. Стрекаловскай, учууталлар Л.М. Габышева, А.И. Дмитриева, Т.П. Охлопкова, Д.П. Сивцева түмэн онордулар.
Тэрээһин улуус ырыа айааччыларын түмсүүтүн чилиэнэ, олохтоох мелодист, бэтэрээн үлэһиппит М.К. Говорова «Оҕо сааһым биһигэ» күргүөмнээх ырыатынан саҕаланна, онтон үөрэнээччилэр эҕэрдэ нүөмэрдэри көрдөрдүлэр.
Кэлбит ыалдьыттар кинигэ бэлэх тутан, ааспыты ахтыһан, кэлэри кэпсэтэн тарҕастылар.
Орто Эбэ анал интэринээт оскуолатын «Сырдат» пресс-киинэ