СӨ Баһаары утары судаарыстыбаннай сулууспатын начальнига Руслан Босиков бу дьыл балаҕан ыйын 10 күнүгэр таһаарбыт 2802 №-дээх бирикээһинэн балаҕан ыйын 11 күнүттэн алтынньы 10 күнүгэр диэри “Олорор дьиэ” операция иккис түһүмэҕэ ыытылынна. Операция сүрүн сыала-соруга баһаары утары үлэни күүһүрдүү, баһаарга хоромньу, киһи өлүүтэ тахсыбатын туһугар үлэни тэрийии.
Биһиги улууспутугар үһүс кыбаарталга дьиэҕэ-уокка 21 баһаар бэлиэтэннэ. Былырыын 18 баһаар бэлиэтэммитэ. Буолбут баһаардар төрүөттэрэ: оттуллар оһохтон – 2, уот ситимиттэн, уокка холбонор прибортан – 9, табахтан – 4, аһаҕас уоттан – 2, соруйан уоттааһын – 1.
Баһаар көһүппэтэх өттүгүттэн хаһан баҕарар буолуон сөп. Хас сыл аайы чааһынай ыалларга баһаар буолуута аччаабат. Ол курдук олорор дьиэлэргэ буолар баһаардар сүрүн биричиинэлэринэн оһох турбатын тахсыыта ирдэбилгэ эппиэттээбэтиттэн, оһоҕу оттон баран хонтуруола суох хаалларыыттан, электрическай прибору холбоон баран тахсыыттан, аһаҕас уоту сэрэҕэ суох туттууттан.
Баһаар үксүн олорор дьиэлэргэ уонна уһаайба иһигэр баар тас тутууларга буолар. Дьиэҕэ кыра оҕону соҕотохтуу таһыттан хатаан барар кутталлаах, төрөппүттэр оҕо тугу барытын боруобалыы сатыырын, төттөрү оҥорорун умнумаҥ, кылгас да кэмҥэ хаалларыы, кыра оҕонон оһоҕу отуннарыы, хонтуруоллатыы куһаҕан түмүктээх буолуон сөбүн умнумаҥ. Дьиэттэн тахсан барарга, утуйуох иннинэ уоту-күөһү араара сылдьыҥ. Дьиэҕитигэр бэйэ оҥорбут электрическэй прибордарын туттумаҥ. Кэмиттэн кэмигэр уот ситимин, розеткалары, предохранителлэри көрөн уларытыҥ. Билигин маҕаһыыннарга уот тэрилин арааһа атыыга элбээтэ. Уот ситимин уларытарга провод кыамтатын көрөн ылыахха наада. Икки араас мааркалаах уот проводын биир дьиэҕэ туттумаҥ.
Күүстээх прибору мөлтөх розеткаҕа холбуур, биир розеткаҕа элбэх күүстээх прибору холбуур ноҕорууска буолан, уот ситимин уматыан сөп. Электрическэй лаампа эмиэ эстиэн сөп, эстэн фитиилэ умайар эттиккэ түстэҕинэ аҕыс да чаас буолан баран, умайыыны таһаарыан сөп. Табах тобоҕо эмиэ 320 кыраадыска диэри итийэр, умуруорбакка бырахтахха аҕыс чааһы быһа умуллубакка сытыан сөп. Баһаар хаһан баҕар күүппэтэх өттүгүттэн буолуон сөп. Баһаар буолбутун тыаһаан биллэрэр баһаарынай извещатели анал маҕаһыынтан атыылаһан туруорунаргытыгар сүбэлиибит.
«Баһаар буолбатын туһугар хас биирдии киһи бэйэтэ сэрэҕи тутуһуохтаах, оҕолору сэрэхтээх буоларга үөрэтиэхтээх. Ыалларга баһаарынай үлэһиттэринэн түҥэтиллэр быраабылалаах кумааҕыны көрүҥ, тутуһуҥ, оҥостуҥ диэн ыҥырабыт.
Улуустааҕы 34 №-дээх баһаарынай сулууспа