Ойуур баһаардара тахсыбаттарын туһугар сэрэтэр үлэлэр тиһигин быспакка ыытыллалларын туһунан улуус дьаһалтатын пресс-сулууспата иһитиннэрэр.
Улуус дьаһалтата ойуур баһаардарын бопсууга эрдэттэн үлэни ыытан, олохтоохтору уонна айылҕа баайын харыстыырга сүрүн болҕомтону уурар. Баһаар тахсар түгэнигэр улуустааҕы ойуур хаһаайыстыбатын тэрилтэтин иһинэн тэриллибит 25 бөлөххө 218 киһи уонна 59 анал техника тахсарга бэлэмнэр.
– Быйыл барыта 39,06 км усталаах минеральнай балаһаны уонна 26,74 км усталаах баһаар разрывын саҥардан оҥоруу соруга турар. Бу үлэлэргэ нэһилиэктэр бюджеттарыттан холбоон 933 159 тыһыынча солкуобай үп көрүллүбүтэ.
Билиҥҥи туругунан, Бороҕон сэлиэнньэтигэр, Оҕуруоттаах, Хоноҕор уонна Уһун Күөл бөһүөлэктэригэр баһаары умуруорууга анаан уу баһар сирдэрэ оҥоһуллубакка турара бэлиэтэнэр. Бу кыһалҕаны туоратыыга үлэ ыытыллар.
• Ыам ыйын 3 күнүгэр Кылаайы бөһүөлэгиттэн 20 км тэйиччи сиргэ, өрүс уҥуор термотуочука тахсыбыта.
• Бороҕоҥҥо сыбаалка сиригэр аһаҕас уот умайыыта тахса сырытта.
• Ыам ыйын 11 күнүгэр 2-с Лөгөй нэһилиэгэр Тулунаттан 7 км тэйиччи Дьуодьу диэн сиргэ тыа баһаара таҕыста. Бу баһаары умуруорууга 15 киһи, 3 анал техника үлэлээн, уоту киэһэ 21:30 чааска тохтоттулар. Уот салгыы тарҕанарын бопсор туһуттан түүннэри дьуһуурустуба олохтонон, ыам ыйын 12 күнүгэр күнүс 12 чааска уоту бүтүннүү умуруорбуттара.
Улууспут убаастабыллаах олохтоохторо!
Тыаҕа сылдьыыны хааччахтааҥ, аһаҕас уоту оттубаккытыгар, табах тобоҕун умуруорбакка эрэ бырахпаккытыгар, баһаартан сэрэхтээх буолуу быраабылаларын тутуһаргытыгар! – диэн ыксаллаах быһыыны-майгыны сэрэтэр улуустааҕы хамыыһыйа ыҥырар.